უკრაინის ცნობით, ვიდეო რუსული ორმაგი დარტყმის მომენტებს აჩვენებს

უკრაინის პოლიციამ გამოაქვეყნა კამერით გადაღებული ვიდეო, რომელშიც, მისი თქმით, ჩანს, რა მოხდა ორ ძლიერ რუსულ საჰაერო დარტყმას შორის. დარტყმებს დახმარების ცენტრსა და თავშესაფარში სულ მცირე 40 ადამიანი ემსხვერპლა.

ჩანაწერი დაღუპული პოლიციელის კამერითაა გადაღებული. მასზე ჩანს, როგორ მიდიან სამხრეთ უკრაინის სოფელ კამიშუვახის მცხოვრებლები მიწისქვეშა თავშესაფარში ორშაბათს მომხდარი პირველი თავდასხმის შემდეგ. ცოტა ხანში აფეთქების ხმა ისმის და ჩანს ცეცხლი, როცა თავშესაფარს ბომბი ხვდება.

პრეზიდენტმა ვოლოდიმირ ზელენსკიმ განაცხადა, რომ ნანგრევების ქვეშ შესაძლოა 30-ზე მეტი ადამიანი იყოს. სამძებრო ოპერაცია უკვე მესამე დღეა გრძელდება.

უკრაინის ცნობით, სოფელს ცხრა მართვადი ბომბი დაეცა, რომელთაგან ზოგი 3 000 კგ-ს იწონიდა. იმ დროს იქ ადამიანები ჰუმანიტარული დახმარების მისაღებად იყვნენ შეკრებილი.

უკრაინის ეროვნულმა პოლიციამ ვიდეო ოთხშაბათს გამოაქვეყნა.

ჩანაწერში ჩანს სოფელში პირველი დარტყმის შემდეგ მიყენებული დიდი ნგრევა. უკრაინის ზაპოროჟიეს რეგიონში მდებარე სოფლის შეძრწუნებული მცხოვრებლები ნანგრევებს უყურებენ.

შემდეგ ორმხრივი რადიოს საშუალებით სამხედრო პირის ხმა ისმის. ის ადგილზე მყოფ პოლიციელებს აფრთხილებს, რომ კამიშუვახისკენ მეტი მართვადი ბომბი გაუშვეს.

„სწრაფად, თავშესაფარში!“, ეუბნება ერთ-ერთი პოლიციელი ადგილობრივ მცხოვრებლებს. ვიდეოში ჩანს, როგორ შედიან ისინი თავშესაფარში, რომელიც სულ მცირე ორი სართულით მიწის ქვეშ მდებარეობს.

რამდენიმე წამში თავშესაფარს ბომბი ხვდება და ჩანაწერი წყდება.

უკრაინის ცნობით, თავშესაფარი ადგილობრივ სკოლასთან მდებარეობდა. სკოლას ჰუმანიტარული დახმარების გასაცემად იყენებდნენ.

ბი-ბი-სი ვერიფაიმ დაადასტურა, რომ ვიდეო იმავე ადგილასაა გადაღებული, სადაც უკრაინის საგანგებო სიტუაციების სახელმწიფო სამსახურის, DSNS-ის, მიერ გამოქვეყნებული ჩანაწერი. მასში ორშაბათს კამიშუვახაზე თავდასხმის შედეგებია ნაჩვენები.

ზელენსკიმ ოთხშაბათს სოციალურ ქსელში დაწერა: „რუსებმა ცხრა საჰაერო ბომბი ჩამოაგდეს.

„ჯერ იმ ადამიანებს დაარტყეს, რომლებიც ჰუმანიტარული დახმარების მისაღებად მივიდნენ, შემდეგ კი მაშველებსა და პოლიციელებს, რომლებიც ადგილზე მივიდნენ“.

უკრაინის პრეზიდენტმა დასძინა, რომ „სამწუხაროდ, ამ შეშლილ თავდასხმას მსოფლიო ძალიან სუსტად გამოეხმაურა“. მან მას რუსეთის მიერ ჩადენილი ათასობით ომის დანაშაულიდან კიდევ ერთი უწოდა.