ზელენსკი გაეროში: „პუტინი ნულოვანი პაციენტია, ის უნდა შეაჩერონ“

„მხოლოდ წელს, იანვრიდან აგვისტოს ჩათვლით, რვა თვეში, რუსეთის არმიამ უკრაინის ბრძოლის ველზე 248 964 ადამიანი დაკარგა. ისინი დაიღუპნენ ან მძიმედ დაიჭრნენ. […] რუსეთმა ჩვენი ტერიტორიის მხოლოდ 1 000 კვადრატულ კილომეტრზე ოდნავ მეტის დაკავება შეძლო. ჩვენ მისი მნიშვნელოვანი ნაწილი უკვე გავათავისუფლეთ. სხვათა შორის, რუსეთი ქვეყანაა, რომელსაც უკრაინის ტერიტორიის გარეშეც 17 მილიონი კვადრატული კილომეტრი აქვს. კიდევ 1 000 კვადრატული კილომეტრის დასამატებლად პუტინი თითოეულ კვადრატულ კილომეტრში 248 ადამიანის სიცოცხლით იხდის.

იცით, პუტინი ცოტა ხნის წინ აშშ-ის პრეზიდენტის წარმომადგენლებს კვლავ დაჰპირდა, რომ ჩვენი დონეცკის რეგიონის დარჩენილ ნაწილს დაიკავებდა. მან თქვა, რომ ამისთვის მხოლოდ რამდენიმე თვე სჭირდება. ეს ალბათ მეჩვიდმეტე ან მეთვრამეტე შემთხვევაა ბოლო ხუთ წელიწადში, როცა მან ეს პირობა დადო. ყოველთვის ერთი და იგივეა: კიდევ რამდენიმე თვე. შემდეგ ვადა კვლავ გადაიწევს. და კვლავ გადაიწევს.

მისთვის ჩვენი დონეცკის რეგიონიც კი საკმარისი არ არის. მას ჩვენი სხვა ქალაქებიც სურს: ოდესა, ხარკოვი, დნიპრო და სხვები. კრემლში ვიღაცამ სურათიც კი გამოაქვეყნა წარწერით „დასაპყრობია“.

როგორც ჩანს, რაღაც ყოველთვის უშლის პუტინს ხელს, უბრალოდ თქვას: „მორჩა. საკმარისია. მშვიდობა“. რაღაც ყოველთვის უშლის მას ხელს, აღიაროს, რომ საკუთარი ტერიტორიის 17 მილიონი კვადრატული კილომეტრი ამ კაცისთვის საკმარისი უნდა იყოს. ეს ტერიტორია ყველა თქვენგანის მიერ საერთაშორისო დონეზეა აღიარებული.

პუტინი ყოველთვის ეძებს ვინმეს, ვინც მას უფრო მეტი ადამიანის მოკვლაში დაეხმარება. მას სურს, მიწის ყოველი კილომეტრისთვის უფრო მეტი ადამიანი მოკლას, მეტი ტერიტორია მიიტაცოს და კიდევ ერთი ქვეყანა დაიპყროს, ნაცვლად იმისა, რომ უბრალოდ გაჩერდეს და საკუთარ ქვეყანას მართოს. ყოველივე ამის შემდეგ, შეგიძლიათ ის საერთოდ ომის გარეშე წარმოიდგინოთ?

ის ნულოვანი პაციენტია, რომლისგანაც ომის ეს იდეა სულ უფრო ფართოდ ვრცელდება. სადაც ის ვრცელდება, მხოლოდ ტკივილი, არასტაბილურობა, ახალი საფრთხეები და, რა თქმა უნდა, ახალი კრიზისები მოაქვს. რაც უფრო მეტი მოქმედების თავისუფლება აქვს პუტინს, მით უფრო სახიფათო ხდება მსოფლიო ყველა დანარჩენისთვის. ამიტომ ნულოვანი პაციენტი უნდა შეაჩერონ. მას მოქმედებისა და ამ ბოროტების შემდგომი გავრცელების სივრცე უნდა წაართვან.

მაგრამ ნავთობი თავისთავად უკრაინის სამიზნე არ არის. ის ჩვენი სამიზნე არ არის. არც ბენზინი ან დიზელი თავისთავად. არც ქარხნები ან პორტები თავისთავად.

ჩვენი სამიზნე რუსეთის შესაძლებლობაა, ეს ომი დააფინანსოს, გაახანგრძლივოს და უფრო სასტიკი და დამანგრეველი გახადოს. თუ პუტინის შეჩერება გვინდა, რუსეთის ფინანსები და წარმოება უნდა შევაჩეროთ. […] ამიტომ რუსეთის შემოსავლები სამიზნედ უნდა დარჩეს.