ზელენსკიმ „კარპატების რვიანის“ შექმნა გამოაცხადა

უკრაინის პრეზიდენტმა ვოლოდიმირ ზელენსკიმ საერთაშორისო თანამშრომლობის ახალი ინიციატივის, „კარპატების რვიანის“, შექმნა გამოაცხადა.

ზელენსკიმ განაცხადა: „ვიწყებთ ახალ ფორმატს, C8-ს, კარპატების რვიანს. ის ჩვენ და ჩვენს ევროპელ მეზობლებს აერთიანებს: რუმინეთს, სერბეთს, პოლონეთს, სლოვაკეთს, ჩეხეთს, ავსტრიას, უნგრეთსა და, რა თქმა უნდა, მთლიანად ევროკავშირს“.

ზელენსკის თქმით, ახალი ფორმატის მიზანი კარპატების რეგიონის სახელმწიფოების, რეგიონებისა და ადგილობრივი თემების გაერთიანებაა. მონაწილეები უსაფრთხოების, ენერგეტიკის, ლოგისტიკისა და საზღვრისპირა ეკონომიკურ საკითხებში თანამშრომლობას გეგმავენ.

„კარპატების რვიანის“ პირველი სამიტი 18 სექტემბერს, უკრაინის ივანო-ფრანკივსკის რეგიონში დაიწყო. მას პოლონეთის პრემიერ-მინისტრი დონალდ ტუსკი, სერბეთის პრეზიდენტი ალექსანდარ ვუჩიჩი და რუმინეთის პრეზიდენტი ნიკუშორ დანი ესწრებიან.

სლოვაკეთის პრემიერ-მინისტრი რობერტ ფიცო სამიტზე არ ჩავიდა, თუმცა ერთი დღით ადრე უკრაინაში ვიზიტს გეგმავდა. უკრაინული გამოცემა „ევროპეისკა პრავდის“ (European Pravda) ცნობით, შეხვედრაზე სლოვაკეთი უფრო დაბალი დიპლომატიური დონითაა წარმოდგენილი.

სამიტს ასევე დაახლოებით 550 ბიზნესის წარმომადგენელი უნდა დაესწროს. ზელენსკის თქმით, სამიტის დასრულებამდე მილიარდი ევროს ღირებულების საინვესტიციო და სავაჭრო შეთანხმებების გაფორმებაა მოსალოდნელი.