აშშ ტეხასში დიდი ოცეულის ენერგეტიკულ მოლაპარაკებებს მასპინძლობს

აშშ ორშაბათს ჰიუსტონში დიდი ოცეულის შეხვედრებს იწყებს და „ენერგიის სიუხვეს“ უჭერს მხარს. ამ დროს პრეზიდენტ დონალდ ტრამპის ომი ირანის წინააღმდეგ გლობალურ საწვავის ბაზრებზე შეფერხებებს განაგრძობს. შეხვედრებს ჩინეთის, ინდოეთის, იაპონიისა და გერმანიის დელეგაციები დაესწრებიან. მათ კანადისა და საუდის არაბეთის წარმომადგენლებიც შეუერთდებიან. შეხვედრაში რუსეთის მონაწილეობასაც ელიან.

აშშ ორშაბათს დიდი ოცეულის შეხვედრების სერიას იწყებს და „ენერგიის სიუხვეს“ უჭერს მხარს. ამავე დროს, პრეზიდენტ დონალდ ტრამპის ომი ირანის წინააღმდეგ გლობალურ საწვავის ბაზრებზე შეფერხებებს განაგრძობს.

მოლაპარაკებები ნავთობით მდიდარ ტეხასის შტატში, ჰიუსტონში, ოთხშაბათამდე გაგრძელდება.

შეხვედრებზე მსოფლიოს უდიდესი ეკონომიკების, მათ შორის, ჩინეთის, ინდოეთის, იაპონიისა და გერმანიის დელეგაციები შეიკრიბებიან. მათ კანადისა და საუდის არაბეთის მსგავსი მსხვილი ნავთობმწარმოებლებიც შეუერთდებიან.

რუსმა დიპლომატებმა შაბათს მიანიშნეს, რომ მოსკოვიც რამდენიმე ოფიციალურ პირს გაგზავნიდა.

ორი კვირის წინ გამართულ დიდი ოცეულის წინა შეხვედრაზე რუსეთის ფინანსთა მინისტრ ანტონ სილუანოვის მოულოდნელმა დასწრებამ აჟიოტაჟი გამოიწვია.

უკრაინის ევროპელმა მოკავშირეებმა იმედგაცრუება გამოთქვეს აშშ-ის გადაწყვეტილების გამო, რომ რუსეთი მიეწვია. ეს მოსკოვის გარიყვის მცდელობებს ეწინააღმდეგებოდა, რაც მეზობელი ქვეყნის წინააღმდეგ რუსეთის ომს უკავშირდებოდა.

ჰიუსტონის შეხვედრები ახლო აღმოსავლეთში მიმდინარე ომის გამო ნავთობისა და გაზის ფასების მკვეთრი ზრდის ფონზე იმართება. ამასთან, ევროპას ზამთრის წინ გაზსაცავების შევსება უჭირს.

აშშ, როგორც დიდი ოცეულის მასპინძელი, ერთ-ერთ პრიორიტეტად ხელმისაწვდომ, საიმედო და უსაფრთხო ენერგიაზე წვდომის გაფართოებას ასახელებს. თუმცა, მას შემდეგ, რაც აშშ და ისრაელი თებერვალში ირანს თავს დაესხნენ, მიწოდება მკვეთრად შეფერხდა.

ამერიკის საავტომობილო ასოციაციის (American Automobile Association, AAA) მონაცემებით, აშშ-ის ბენზინგასამართ სადგურებზე ფასები მკვეთრად გაიზარდა. ერთი გალონი, ანუ 3,78 ლიტრი დიზელის ფასი რეკორდულ ნიშნულს აღწევს და ახლა საშუალოდ 6,20 დოლარია.

ჩვეულებრივი ბენზინიც ომამდელ პერიოდთან შედარებით 44%-ით ძვირია.

არაპოპულარული ომისა და მისი შედეგების გამო, ტრამპის რესპუბლიკურ პარტიას ნოემბრის შუალედურ არჩევნებში დამარცხების ეშინია.

აშშ-ის პრეზიდენტმა ირანი კონფლიქტის გახანგრძლივებაში დაადანაშაულა, რათა მისთვის პოლიტიკური ზიანი მიეყენებინა. ტრამპმა ცოტა ხნის წინ განაცხადა, რომ არჩევნების შემდეგ ომი „დაუყოვნებლივ“ დასრულდებოდა.