ავსტრალიამ ევროკავშირთან კავშირების გაღრმავება არ გამორიცხა

ავსტრალია მხარს უჭერს კანადის ძალისხმევას, ევროკავშირთან უფრო მჭიდრო კავშირები დაამყაროს. ამ დროს ოტავასა და აშშ-ს შორის სავაჭრო დავა მწვავდება.

უოლ სტრიტ ჯორნალმა (The Wall Street Journal) გაავრცელა ინფორმაცია, რომ კანადა ევროკავშირის „ასოცირებული წევრის“ სტატუსს განიხილავდა. პრემიერ-მინისტრმა მარკ კარნიმ კვირას განმარტა, რომ მისი ქვეყანა სრულ წევრობას კი არა, ბლოკთან „უნიკალურ ალიანსს“ ეძებდა.

ავსტრალიის ვაჭრობის მინისტრმა დონ ფარელმა სამშაბათს სიდნეი მორნინგ ჰერალდს (Sydney Morning Herald) განუცხადა: „ჩვენ ერთნაირი პოზიცია გვაქვს. დიდი ინტერესით დავაკვირდებით, რას გააკეთებს კარნი“.

ფარელს არ დაუკონკრეტებია, ცდილობდა თუ არა ავსტრალია ევროკავშირთან ურთიერთობის გაღრმავებას ან რა ფორმა შეიძლებოდა მას ჰქონოდა.

ვაშინგტონთან ხანგრძლივი უსაფრთხოების პაქტისა და თავისუფალი ვაჭრობის შეთანხმების მიუხედავად, აშშ-მა ავსტრალიურ ექსპორტს საბაჟო ტარიფები დაუწესა. ამის შემდეგ ავსტრალია სავაჭრო ურთიერთობების დივერსიფიცირებას ცდილობდა.

საგარეო საქმეთა და ვაჭრობის დეპარტამენტის წარმომადგენელმა კომენტარის თხოვნას არ უპასუხა.

ჟურნალის ცნობით, კანადა და ევროკავშირი ძირითად სექტორებში კანადური საქონლის, მომსახურებისა და მუშაკების თავისუფალ გადაადგილებაზე მსჯელობენ. ეს სექტორებია ხელოვნური ინტელექტი, ენერგეტიკა, თავდაცვა და კრიტიკული მინერალები. შეთანხმება, ფაქტობრივად, ევროკავშირის საზღვარს გადაწევს. მოლაპარაკებები საერთო ინფრასტრუქტურულ პროექტებსაც მოიცავს, მათ შორის, წყალქვეშა კაბელებს, მონაცემთა ცენტრებსა და ღრუბლოვან საცავებს. ასევე განიხილება თანამგზავრული ქსელები და ენერგიის ტრანსპორტირების ობიექტები.

გამოცემის ცნობით, კარნი ევროკავშირის ლიდერებს რეგულარულად ესაუბრებოდა. მან, განსაკუთრებით, საფრანგეთის პრეზიდენტ ემანუელ მაკრონთან განიხილა, რომ კანადელებს ევროკავშირში უვიზოდ ცხოვრებისა და მუშაობის უფლება მიეღოთ. გამოცემა ორ ანონიმურ ოფიციალურ პირს დაეყრდნო.

ფარელმა განაცხადა, რომ ევროკავშირთან სამომავლო შეთანხმებებში ყველა ვარიანტისთვის მზად იყო. მან მანძილის გამო ოპტიკურ-ბოჭკოვანი კაბელები გამორიცხა.

ფარელმა თქვა: „მსოფლიო პროტექციონისტებად და თავისუფალი ვაჭრობის მომხრეებად იყოფა. უდავოა, რომ ბოლო 50 წლის განმავლობაში ავსტრალიის კეთილდღეობა მთლიანად მსოფლიოსთან ჩვენს ურთიერთობას ეფუძნებოდა“.

რვაწლიანი მოლაპარაკებების შემდეგ ავსტრალიამ და ევროკავშირმა მარტში თავისუფალი ვაჭრობის შეთანხმებას მოაწერეს ხელი. შეთანხმებამ თითქმის ყველა საქონელზე საბაჟო ტარიფები გააუქმა და შესაძლოა, ევროკავშირს ავსტრალიის კრიტიკულ მინერალებზე წვდომა გაუადვილოს.