დანიის დაზვერვა ნატოს ქვეყანაზე რუსეთის შესაძლო თავდასხმაზე აფრთხილებს

დანიის სადაზვერვო სამსახურებმა ხუთშაბათს გააფრთხილეს, რომ მომდევნო თვეებში რუსეთმა ნატოს ერთ ან რამდენიმე წევრ ქვეყანაზე „შეზღუდული“ თავდასხმა შეიძლება დაიწყოს. დანიის უსაფრთხოებისა და დაზვერვის სამსახურმა (PET) შეფასებაში განაცხადა: „მიზანი ევროპული რესურსების სხვა მიმართულებით გადატანა იქნებოდა, რათა უკრაინის მხარდაჭერა შეწყდეს. კიდევ ერთი მიზანი ნატოში განხეთქილების დათესვა იქნებოდა, თუ ალიანსი ერთობლივ პასუხზე ვერ შეთანხმდებოდა“. კოპენჰაგენის გაფრთხილება ევროპაში რუსეთისგან მომდინარე საფრთხის დონეს ზრდის. მანამდე ექვსი დღით ადრე პარიზმა კრემლის ჰიბრიდული შეტევის გაძლიერების გამო საფრანგეთის კრიტიკული ინფრასტრუქტურის დაცვის გაძლიერება ბრძანა.

დანიის დაზვერვის მოკლე ანგარიშის თანახმად, რუსეთის აგრესიის სამიზნე ალიანსის ის ქვეყნები იქნებოდა, რომლებიც რუსეთის ტერიტორიას ესაზღვრება. მათ შორისაა ბალტიის სამი სახელმწიფო, ლატვია, ლიეტუვა და ესტონეთი, ასევე პოლონეთი, ფინეთი და ნორვეგია. PET განმარტავს, რომ რისკი ჯერ კიდევ „დაბალია, თუმცა იზრდება“. მოსკოვი ამ გზით დასავლეთის მიერ კიევისთვის დახმარების მიწოდების შეჩერებას ცდილობს. ამავდროულად, უკრაინის აღმოსავლეთ ნაწილში ფრონტი თითქმის არ იცვლება. დანიის სადაზვერვო სამსახურების შეფასებაში წერია: „ეს შეიძლება მაშინაც მოხდეს, თუ რუსეთი უკრაინის წინააღმდეგ ომს განაგრძობს და რეგიონული ომისთვის საჭირო სამხედრო შესაძლებლობები ჯერ არ შეუქმნია“.

ევროპის მთავრობებში რუსეთის შესაძლო აგრესიის რისკზე სულ უფრო აქტიურად საუბრობენ. საუბარია ჩვეულებრივი, კინეტიკური იარაღის გამოყენებაზე. ბოლო განცხადებებიც ამ შეშფოთებას აძლიერებს. საფრანგეთის პრეზიდენტმა ემანუელ მაკრონმა გასულ პარასკევს განაცხადა, რომ „ევროპელებისა და საფრანგეთის წინააღმდეგ რუსეთის ჰიბრიდული საფრთხე“ ბოლო დროს გაძლიერდა. იმავე დღეს პოლონეთის პრემიერ-მინისტრმა დონალდ ტუსკმა თქვა, რომ რამდენიმე კვირაში ან თვეში მოსკოვმა მისი ქვეყნის ან ალიანსის რომელიმე მოკავშირის წინააღმდეგ „დრონებითა და რაკეტებით ჰიბრიდული თავდასხმები“ შეიძლება განახორციელოს. რამდენიმე დღის შემდეგ ნორვეგიის პრემიერ-მინისტრმა იონას გარ სტორემ მოუწოდა ყველას, ტუსკის სიტყვებს დიდი სერიოზულობით მოჰკიდებოდნენ.

ბრიუსელში საფრთხეს განიხილავენ როგორც ნატოს შტაბ-ბინაში, ისე ევროკავშირის დაწესებულებებში. ამასთან ერთად, დღის წესრიგში სწრაფი გადაიარაღების საჭიროებაც დგას. აქამდე ყველაზე უარესი სცენარებით, ალიანსზე რუსეთის შესაძლო თავდასხმა ათწლეულის ბოლოს იყო მოსალოდნელი. თუმცა ბოლო კვირებში ეს ვადა თითქოს ახლოვდება. ამ პერიოდში კრემლის ხელწერის მქონე ჰიბრიდული შეტევა გაძლიერდა, მათ შორის, დივერსიები, ალიანსის საჰაერო სივრცეში შეჭრა და დრონებით თავდასხმები. დანიის დაზვერვას საფრთხის ამჟამინდელი დონის ნათელ მაგალითად 5 აგვისტოს ინციდენტი მოჰყავს. გერმანიის ლაიფციგის აეროპორტში ასაფეთქებლით დატვირთული დრონით უკრაინულ სატვირთო თვითმფრინავზე თავდასხმა ვერ განხორციელდა. ბერლინმა ოპერაციის უკან დგომაში მოსკოვი ოფიციალურად დაადანაშაულა.