ევროკავშირი 13 წლამდე ბავშვებისთვის სოციალურ მედიას კრძალავს

ევროკომისიის პრეზიდენტმა დაადასტურა, რომ ევროკავშირი 13 წლამდე ბავშვებისთვის სოციალური მედიის აკრძალვის გეგმას განახორციელებს.

ურსულა ფონ დერ ლაიენმა ოთხშაბათს განაცხადა, რომ სოციალური მედიის აპლიკაციები ბავშვებს „ბავშვობას ართმევს“. მისი თქმით, დიდმა ტექნოლოგიურმა პლატფორმებმა საკუთარი პროდუქტების უსაფრთხოება უნდა დაამტკიცონ.

მან 13 წლამდე ბავშვებისთვის სოციალური მედიის სრულად აკრძალვის კანონპროექტი დააანონსა. 13-15 წლის ბავშვებს კი მშობლების ზედამხედველობით „მინი ანგარიშებით“ სარგებლობის უფლება ექნებათ. აპლიკაციების გამოყენების დრო შეიზღუდება.

ევროკომისია სოციალური მედიის გეგმას ხუთშაბათს გამოაქვეყნებს. კანონად ქცევისთვის მას ევროპარლამენტისა და ევროკავშირის 27 წევრი სახელმწიფოს თანხმობა დასჭირდება.

ფონ დერ ლაიენმა ასევე ისაუბრა ევროკომისიის ციფრული სამართლიანობის აქტზე, რომელსაც ევროპარლამენტს მიმდინარე წლის ბოლოს წარუდგენენ. მისი თქმით, აქტი დამოკიდებულების გამომწვევი დიზაინის მსგავს მახასიათებლებს შეზღუდავს, რადგან ისინი „ყველას აზიანებს“.

ევროკომისიის პრეზიდენტმა ეს განცხადებები სტრასბურგში, კავშირის მდგომარეობის შესახებ ყოველწლიური მოხსენების წარდგენისას გააკეთა. ფართო თემატიკის სიტყვაში მან არეულ მსოფლიოში ევროკავშირის ადგილი და მთელი კონტინენტისთვის განკუთვნილი კანონმდებლობის გეგმები განიხილა. მან ასევე ევროპის სიცხის ტალღების გეგმა დააანონსა. აგვისტოში ესპანეთის ანკლავ სეუტაში განვითარებული მოვლენების შემდეგ, ფონ დერ ლაიენმა მიგრანტების უეცარი ნაკადების სამართავად საგანგებო რეაგირების მექანიზმის შექმნის ვალდებულება აიღო.

ფონ დერ ლაიენმა „ღიად მტრულ სამყაროზე“ საუბრისას კანადას უპრეცედენტო წინადადება შესთავაზა, რომ ევროკავშირის „ასოცირებული წევრი“ გახდეს. მან ასევე ევროპის უსაფრთხოების საბჭოს შექმნის იდეების წარმოდგენა იკისრა. მასში კანადა, ნორვეგია, უკრაინა და გაერთიანებული სამეფო უნდა მონაწილეობდნენ.

გერმანიის ყოფილმა თავდაცვის მინისტრმა განაცხადა, რომ ევროკავშირს ნატოს მე-4 მუხლის საკუთარი ვერსია სჭირდება. ეს „უსაფრთხოების საგანგებო ოქმი“ იქნება, რომლის თანახმადაც, ჰიბრიდულ თავდასხმაზე რეაგირებისთვის ერთი წევრი სახელმწიფოს მოთხოვნით ყველა წევრი შეიკრიბება.

ფონ დერ ლაიენმა თქვა: „ევროპას ჰიბრიდულ საფრთხეებთან ბრძოლის საკუთარი გეგმა სჭირდება“. მან დასძინა: „სასწრაფოდ უნდა შევთანხმდეთ, როგორ ვუპასუხოთ გარკვეულ ინციდენტებს, რომლებიც შეიარაღებულ აგრესიად არ ითვლება, მაგრამ ჩვენს ეროვნულ უსაფრთხოებას აშკარად ემუქრება“.

ნატოს მე-4 მუხლი კოლექტიური თავდაცვის შესახებ მე-5 მუხლისგან განსხვავდება. ის ალიანსის წევრებს კონსულტაციის საშუალებას აძლევს, როცა ერთ-ერთი მათგანი საკუთარ ტერიტორიულ მთლიანობას, პოლიტიკურ დამოუკიდებლობას ან უსაფრთხოებას საფრთხის ქვეშ მიიჩნევს.