ევროკავშირი დიდი ოცეულის სამიტზე უკრაინის ომს დაგმობს

ევროკავშირის განცხადებით, ის ამას გააკეთებს იმის მიუხედავად, დაესწრება თუ არა რუსეთის პრეზიდენტი ვლადიმერ პუტინი სამიტს. მას წლევანდელი მასპინძელი ქვეყანა, აშშ, მიიწვევს. კრემლმა განაცხადა, რომ პუტინი ვაშინგტონის მიწვევას „განიხილავს“.

რუსეთის ლიდერი მასპინძელი ქვეყნების ოფიციალური მიწვევის მიუხედავად არც 2023 წელს ინდოეთის ქალაქ ნიუ-დელიში გამართულ დიდი ოცეულის სამიტს დასწრებია და არც 2022 წელს ინდონეზიის კუნძულ ბალიზე გამართულ შეხვედრას.

ხუთშაბათს უკრაინაზე რუსეთის დარტყმების ტალღას რვა ადამიანი ემსხვერპლა.

ევროკავშირმა განაცხადა, რომ უკრაინაში ომის დასრულების მოწოდებას გააგრძელებს.

ევროკავშირის პრესსპიკერმა ოლოფ გილმა თქვა: „2022 წლიდან ევროკავშირი დიდი ოცეულის შეხვედრებს თანმიმდევრულად და მტკიცედ იყენებს, რათა დაგმოს რუსეთის სრულმასშტაბიანი შეჭრა უკრაინაში და მისი დასრულებისკენ მოუწოდოს“.

გილმა დასძინა: „დღეს შემიძლია ვთქვა, რომ ევროკავშირის თვალსაზრისით, ეს მიდგომა დიდი ოცეულის ნებისმიერ შეხვედრაზე მონაწილეთა ვინაობის მიუხედავად გაგრძელდება“.

გილის თქმით, რუსეთი დიდი ოცეულის წევრად რჩება და მის შეხვედრებში „მონაწილეობის უფლება“ აქვს.

დიდი ოცეულის წევრები თავად ევროკავშირი და მისი სამი წევრი სახელმწიფოცაა: საფრანგეთი, გერმანია და იტალია.

უკრაინის მოკავშირეები, მათ შორის დიდი ოცეულის წევრები საფრანგეთი, გერმანია, იტალია, გაერთიანებული სამეფო და კანადა, ჯგუფიდან რუსეთის გარიცხვას ითხოვენ. ეს მოწოდებები მას შემდეგ გაისმა, რაც მოსკოვმა 2022 წლის თებერვალში უკრაინაში შეჭრა დაიწყო.

აშშ-ის სახელმწიფო მდივანმა მარკო რუბიომ პუტინის მიწვევა ნიუ-იორკში, გაეროს გენერალური ასამბლეის ფარგლებში, რუსეთის საგარეო საქმეთა მინისტრ სერგეი ლავროვთან შეხვედრის შემდეგ გამოაცხადა.

რუბიომ ოთხშაბათს განაცხადა: „მიგვაჩნია, რომ ეს მისთვის შესაძლებლობაა, არა მხოლოდ აშშ-ის პრეზიდენტ დონალდ ტრამპთან, არამედ მსოფლიოს სხვა ლიდერებთანაც იურთიერთოს. ვიმედოვნებთ, რომ ის მიწვევას მიიღებს“.

პუტინი აშშ-ს ბოლოს 2025 წლის 15 აგვისტოს ეწვია, როცა ალასკის ქალაქ ანკორიჯში ტრამპთან სამიტში მონაწილეობდა. ეს უკრაინაში ომის დაწყების შემდეგ მისი პირველი ვიზიტიც იყო დასავლეთის ქვეყანაში.

შინაგან საქმეთა მინისტრმა იჰორ ვიჰივსკიმ განაცხადა, რომ უკრაინის ჩრდილო-აღმოსავლეთ ხარკოვის რეგიონზე დარტყმას სულ მცირე ექვსი სოფლის მეურნეობის მუშაკი ემსხვერპლა, 12 ადამიანი კი დაიჭრა.

რეგიონულმა პროკურატურამ თავდასხმის შემდეგ განადგურებული საწყობის შიდა სივრცის ამსახველი ფოტოები გამოაქვეყნა.