სპარსეთის ყურეში ნავთობმზიდზე თავდასხმას მეზღვაური ემსხვერპლა

ნავთობმზიდზე სპარსეთის ყურეში მომხდარმა აფეთქებამ, რომელიც, სავარაუდოდ, სარაკეტო თავდასხმამ გამოიწვია, ერთი მეზღვაური იმსხვერპლა, განაცხადა გემის ოპერატორმა კომპანიამ პარასკევს.

ბერძნულმა მმართველმა კომპანიამ Velos Tankers-მა განაცხადა, რომ მარშალის კუნძულების დროშის ქვეშ მცურავი ნავთობმზიდი MT Velos Sapphire ბაჰრეინისკენ მიემართებოდა, როცა მას თავს დაესხნენ.

კომპანიამ დაწერა: „კომპანია დიდ მწუხარებას გამოთქვამს თავისი ერთი მეზღვაურის გარდაცვალების გამო. აფეთქების შემდეგ ის ბორტზე სასიკვდილოდ დაშავებული იპოვეს, მანამდე კი დაკარგულად მიიჩნეოდა“.

აფეთქების შედეგად გემზე ხანძარი გაჩნდა. ეკიპაჟმა ხანძრის ჩაქრობა შეძლო და სხვა დაშავებულების შესახებ არ უცნობებია.

საბოლოოდ გემი ბაჰრეინის ხალიფა ბინ სალმანის პორტში შევიდა. ახლა ინციდენტს გამოიძიებენ, რათა გემის კორპუსის დაზიანების მასშტაბი შეაფასონ.

ეს სპარსეთის ყურეში გემებზე ირანის თავდასხმების ბოლო შემთხვევაა.

აშშ-ის გაზეთმა უოლ სტრიტ ჯორნალმა (The Wall Street Journal, WSJ) რეგიონულ ოფიციალურ პირებზე, უსაფრთხოების კომპანიებსა და ანალიტიკოსებზე დაყრდნობით გამოაქვეყნა მასალა, რომელშიც აღწერილია, როგორ იყენებს ირანი ყველა შესაძლო საშუალებას ჰორმუზის სრუტიდან ნავთობის გატანის შესაჩერებლად.

მასალის თანახმად, ბოლო კვირებში თეირანმა გაუშვა ასაფეთქებელი ნივთიერებებით დატვირთული წყალქვეშა დრონები, ისროლა რეაქტიული ჭურვები და გემებზე მაგნიტური ნაღმების დასამაგრებლად ჯგუფები გაგზავნა.

გაერთიანებული სამეფოს საზღვაო სავაჭრო ოპერაციების ცენტრის (UKMTO) მონაცემებით, ოქტომბერში ჰორმუზის სრუტეში ომის დაწყების შემდეგ თავდასხმების ყველაზე მეტი შემთხვევა დაფიქსირდა, 35-ზე მეტი.

UKMTO-მ დასძინა, რომ ნოემბერში დღემდე სულ მცირე ხუთ გემს დაესხნენ თავს.

თავდასხმების გახშირებას ჰორმუზის გავლით საზღვაო გადაზიდვების აღდგენის ნიშნებიც ემთხვევა. აშშ-ის ცენტრალურმა სარდლობამ გასულ თვეში განაცხადა, რომ ზაფხულიდან მოყოლებული ყურის ქვეყნების დახმარებით ჰორმუზის გავლით 1,5 მილიარდი ბარელი ნავთობის ექსპორტი განხორციელდა.

ხუთშაბათს ირანულმა მედიამ გაავრცელა ინფორმაცია, რომ ჰორმუზის სრუტეში ნაღმებზე შეჯახების შემდეგ ხუთ ნავთობმზიდსა და ბუქსირს ცეცხლი გაუჩნდა.

ირანის სახელმწიფო მედიის ცნობით, ირანის ისლამური რევოლუციის გვარდიის კორპუსმა პარასკევს განაცხადა, რომ სრუტეში კიდევ ორ ნავთობმზიდს ეკიდა ცეცხლი.