გაერთიანებულმა სამეფომ რუსეთს 31 ახალი სანქცია დაუწესა

საგარეო საქმეთა სამინისტროს განცხადებით, ახალი ზომები მოიცავს სანქციებს „თხევადი ბუნებრივი აირის ჩრდილოვანი ფლოტის გემების, კრემლის დეზინფორმაციის ქსელებისა და მშვიდობიანი მოსახლეობის წამებასა და ბავშვების იდეოლოგიურ დამუშავებაში მონაწილე პირების“ წინააღმდეგ.

სამინისტრომ აღნიშნა: „ზომები მას შემდეგ მივიღეთ, რაც რუსეთმა სექტემბერში უკრაინისკენ 3 100-ზე მეტი რეაქტიული დრონი გაუშვა და აგვისტოში დამყარებულ ომის დროინდელ შემზარავ რეკორდს გადააჭარბა“.

განცხადების თანახმად, სანქციები შეეხო რვა ადამიანს, რომლებიც უკრაინელი მშვიდობიანი მოსახლეობის „თვითნებურ დაკავებაში, წამებასა და არასათანადო მოპყრობაში“ მონაწილეობდნენ.

სამინისტრომ დასძინა, რომ სანქციების სამიზნე კიდევ შვიდი ადამიანი გახდა. ისინი უკრაინელი ბავშვების, მათ შორის რუსეთის ხელისუფლების მიერ დეპორტირებული ბავშვების, „იდეოლოგიურ დამუშავებასა და მილიტარიზაციაში“ მონაწილეობდნენ.

ევროპის საკითხებში მინისტრმა, ენფილდის ლორდმა ვუდმა, განაცხადა: „ჩვენ სამიზნეში ვიღებთ როგორც შემოსავლებს, რომლებიც რუსეთის აგრესიის გაგრძელებას უწყობს ხელს, ისე უკრაინელი მშვიდობიანი მოსახლეობის, მათ შორის ბავშვების, წინააღმდეგ ჩადენილი შემზარავი დანაშაულების მონაწილეებს. გაერთიანებული სამეფო უკრაინის მხარდაჭერაში უკან არ დაიხევს“.

გაერთიანებული სამეფოს მთავრობამ აღნიშნა, რომ ახალი ზომები პარტნიორებთან ერთად ქვეყნის მტკიცე ნებას აჩვენებს. მათი მიზანია უკრაინის წინააღმდეგ „რუსეთის სახელმწიფო აგრესიაზე“ პასუხისმგებელი პირების პასუხისგებაში მიცემა, ომისთვის საჭირო შემოსავლების შეზღუდვა და უკრაინის, გაერთიანებული სამეფოსა და ევროპის უსაფრთხოების დაცვა.

განცხადებაში ნათქვამია: „გაერთიანებული სამეფო რუსეთთან დაპირისპირებას არ ესწრაფვის. თუმცა, სანამ პრეზიდენტი ვლადიმერ პუტინი ამ უაზრო და ბარბაროსული ომის დასრულებას არ გადაწყვეტს, უკრაინისადმი გაერთიანებული სამეფოს მხარდაჭერა ურყევი დარჩება“.