ღაზაში ისრაელის თავდასხმებს სამი პალესტინელი ემსხვერპლა

ღაზის სექტორის სხვადასხვა ნაწილში ისრაელის თავდასხმებს სულ მცირე სამი პალესტინელი ემსხვერპლა, მათ შორის ბავშვი და ჯანდაცვის სამინისტროს მაღალჩინოსნის ვაჟი. სხვა ადამიანები დაშავდნენ.

სასწრაფო დახმარების სამსახურის წყარომ Al Jazeera-ს განუცხადა, რომ შაბათს ისრაელის ძალებმა ღაზის ქალაქის აღმოსავლეთით, შუჯაიეის რაიონს შეუტიეს. თავდასხმას ერთი პალესტინელი ემსხვერპლა.

დეირ ელ-ბალაჰში მდებარე ალ-აქსას წამებულთა საავადმყოფომ განაცხადა, რომ გოგონა მიღებული ჭრილობებით გარდაიცვალა. ის შაბათს, ცენტრალურ ღაზაში, ნუსეირათის ლტოლვილთა ბანაკის ჩრდილოეთით ისრაელის ძალების სროლისას დაიჭრა.

საავადმყოფომ ასევე განაცხადა, რომ ისრაელის ძალების სროლისას ქალი მძიმედ დაიჭრა. შემთხვევა ცენტრალურ ღაზაში, მაღაზის ლტოლვილთა ბანაკის აღმოსავლეთით მოხდა.

სამედიცინო წყაროებმა Al Jazeera-ს განუცხადეს, რომ ისრაელის საჰაერო თავდასხმას ახალგაზრდა პალესტინელი ემსხვერპლა და რამდენიმე ადამიანი დაშავდა. თავდასხმა ჩრდილოეთ ღაზაში, ჯაბალიის ლტოლვილთა ბანაკის დასავლეთით მოხდა.

მოგვიანებით ღაზის ჯანდაცვის სამინისტრომ განცხადებაში აღნიშნა, რომ თავდასხმისას ბასირ ალ-ბურში დაიღუპა. ის სამინისტროს გენერალური დირექტორის, მუნირ ალ-ბურშის ვაჟი იყო. თავდასხმა ჯაბალიის ლტოლვილთა ბანაკის დასავლეთით, აზ-ზაჰრას რაიონში მოხდა.

სამინისტრომ განაცხადა: „ხელმძღვანელობა და თანამშრომლები ღრმა მწუხარებასა და გულწრფელ თანაგრძნობას უცხადებენ ჩვენს პატივცემულ ძმასა და ძვირფას კოლეგას, ექიმ მუნირ აბდულა ალ-ბურშს, მისი ერთგული უფროსი ვაჟის, ახალგაზრდა ბასირის, მოწამებრივად დაღუპვის გამო“.

2025 წლის ოქტომბერში ისრაელსა და ჰამასს შორის აშშ-ის შუამავლობით „ცეცხლის შეწყვეტის“ გამოცხადების შემდეგ, ალყაში მოქცეულ ტერიტორიაზე ისრაელის თავდასხმებმა სულ მცირე 1 381 ადამიანი იმსხვერპლა.

2023 წლის ოქტომბერში ღაზაში პალესტინელების წინააღმდეგ გენოციდური ომის დაწყების შემდეგ, ისრაელმა სულ მცირე 73 795 ადამიანი მოკლა და 174 869 დაჭრა.

გაეროს ბავშვთა სააგენტო იუნისეფმა გასულ თვეში განაცხადა, რომ ღაზაში ისრაელი დღეში საშუალოდ ერთ ბავშვს კლავს.

სააგენტოს ცნობით, პალესტინური ოჯახები ახლა ტერიტორიის დაახლოებით ერთ მესამედში არიან მოქცეული. ისინი დანგრეულ შენობებს, ნანგრევებსა და გაუტანელ ნარჩენებს შორის აფარებენ თავს.