„კამპუსი 2026“: საქართველო პროექტის მთავარ თემად იქცა

პროგრამის ერთ-ერთი მთავარი ნაწილია ქართველი კომპოზიტორის, მიკა მდინარაძის მიერ შექმნილი ახალი სინთეზი. კომპოზიცია ბეთჰოვენის საგუნდო ნაწარმოებს „ევროპა დგას!“ კანტატიდან „დიდებული წამი“ ტრადიციულ ქართულ სიმღერებთან აერთიანებს.

მდინარაძემ დოიჩე ველეს განუმარტა: „ბეთჰოვენის მუსიკა აშკარად ამოსაცნობი რჩება, ქართული მრავალხმიანი სტრუქტურები კი საკუთარ იდენტობას ინარჩუნებს. ერთად ისინი ევროპის ხმოვან მოდელს ქმნის: იძულებითი ერთიანობის ნაცვლად დიალოგს და მუსიკალურ განცხადებას იმის შესახებ, თუ სადაა საქართველოს ადგილი“.

ბონის ბეთჰოვენის ფესტივალი „კამპუსის“ პროექტს 2001 წლიდან მართავს. პროექტი ახალგაზრდა მუსიკოსებს შორის გაცვლის პლატფორმაა და ისტორიული გარდაქმნების პროცესში მყოფ ქვეყნებზეა ორიენტირებული.

ბეთჰოვენის ფესტივალზე „კამპუსის“ გუნდის ხელმძღვანელმა თომას შაიდერმა თქვა: „წინა პროექტებში მონაწილეობდნენ უკრაინა, ავღანეთი, ირანი და ახლა, მეორედ, საქართველო, რომელიც პირველად 2003 წელს ჩაერთო. ამ ადგილებში კულტურა ისტორიის უბრალო თანმხლები მოვლენა არ არის. ის მთავარ ასპარეზად იქცევა, სადაც ისტორიას იაზრებენ, განიხილავენ და კითხვის ნიშნის ქვეშ აყენებენ“.

ახალგაზრდული ფედერალური ორკესტრი „კამპუსის“ პროექტს 10 წელია პარტნიორის რანგში ქმნის. მისთვისაც ეს შეხვედრა მუსიკის ფარგლებს გასცდა. ორკესტრის დირექტორმა და პროექტის ერთ-ერთმა ორგანიზატორმა ზიონკე ლენცმა აღნიშნა: „მართალია, ყურადღების ცენტრში მუსიკაა, მაგრამ გაცვლამ გაცილებით მეტი წარმოაჩინა: პირადი კავშირები, კულტურული სიმდიდრე, მნიშვნელოვანი ისტორია, შთამბეჭდავი ბუნება და რთული მიმდინარე პოლიტიკური ვითარება. პროევროპელ ხელოვანებსა და, სავარაუდოდ, მოსახლეობის უდიდეს უმრავლესობას ჩვენი სოლიდარობა და მხარდაჭერა სჭირდება“.

ახალგაზრდულმა ფედერალურმა ორკესტრმა პროექტი წლევანდელ საერთაშორისო ტურნეშიც შეიტანა. მირიან ხუხუნაიშვილის ხელმძღვანელობითა და სოლისტ გიორგი გიგაშვილის მონაწილეობით მან საქართველოში სამი კონცერტი გამართა. ლენცმა თქვა: „თბილისსა და ქუთაისში სრულად გაყიდულმა კონცერტებმა და ფეხზე წამომდგარი აუდიტორიის ოვაციებმა ჩვენზე შთაბეჭდილება მოახდინა. ამან ასეთი პროექტის მნიშვნელობაც დაგვანახა“.

დირიჟორმა დანიელ ბარენბოიმმა ქართველ პიანისტსა და კომპოზიტორ ცოტნე ზედგინიძეს 16 წლის ასაკში „ახალი მოცარტი“ უწოდა.

ზედგინიძე ახლახან 17 წლის გახდა და პროექტის ისტორიაში ყველაზე ახალგაზრდა დაკვეთილი ნაწარმოების ავტორია. მან ფორტეპიანოსა და კამერული ორკესტრისთვის „ხმები: ქართული ფანტაზია“ შექმნა. ახალგაზრდა კომპოზიტორი ბონში მსოფლიო პრემიერაზე და შემდეგ ბერლინში თავად დაუკრავს ფორტეპიანოზე. ზედგინიძემ ღიმილით თქვა: „ბეთჰოვენი სრულიად შოკირებული იქნებოდა, თუმცა ეს მას შთააგონებდა“. კომპოზიტორმა პარტიტურაში პირველად გამოიყენა ძველი და რთული ქართული ხალხური ტრადიციები. მან ისინი უჩვეულო ჰარმონიებსა და ენერგიული ხალხური ცეკვის ელემენტებს შეუხამა. ზედგინიძემ დოიჩე ველეს უთხრა: „ვეცადე, ჩემი ქართული ფანტაზია ხელოვნური არ ყოფილიყო. ის შეძლებისდაგვარად ჰგავს ყველა ჟანრისა და სტილის ქართულ მუსიკას. ამავე დროს, ეს ჩემი ინდივიდუალური გააზრება და ქართული მუსიკის ჩემეული ინტერპრეტაციაა“.

ვარსკვლავი მევიოლინე ლიზა ბათიაშვილი ცოტნეს ნაწარმოების პრემიერას მოუთმენლად ელოდება. მუსიკოსი, რომელიც 12 წლის ასაკში საქართველოდან გერმანიაში გადავიდა, საკუთარი ფონდის მეშვეობით სამშობლოში ახალგაზრდა ხელოვანებს ეხმარება. ცოტნე ფონდის სტიპენდიატებს შორისაა.

ბათიაშვილმა თქვა: „ბოლო 20 წლის განმავლობაში ვხედავდი, როგორ იზრდებოდა გერმანიისა და საქართველოს მეგობრობა. ასევე ვხედავდი, რამდენად ღიად და დიდი ინტერესით ეკიდებოდნენ აქ ჩემს სამშობლოს. განსაკუთრებით სასიამოვნოა ორივე ქვეყნის ახალგაზრდა მუსიკოსების ერთად დაკვრა, ერთმანეთისგან სწავლა და შთაგონება“. ბათიაშვილის თქმით, შესაძლოა, აქედან მუსიკაზე უფრო დიდი რამ, საერთო მომავლის ხედვა წარმოიშვას.

თემებიგიორგი გიგაშვილიდანიელ ბარენბოიმიზიონკე ლენცითომას შაიდერილიზა ბათიაშვილიმიკა მდინარაძემირიან ხუხუნაიშვილიცოტნე ზედგინიძებონის ბეთჰოვენის ფესტივალიდოიჩე ველე

გამოქვეყნდა 23 სექტემბერი, 2026