მარინ ლე პენის პარტიამ სენატში მეტი უფლება მოიპოვა

აქამდე RN-ს სამი ადგილი ჰქონდა, ფრაქციის შესაქმნელად კი სულ მცირე ათი ადგილია საჭირო. ფრაქციის სტატუსით RN-ს ახლა მეტი უფლება აქვს. ეს ეხება გამოსვლის დროს, მთავრობისთვის კითხვების დასმასა და დღის წესრიგის განსაზღვრას.

ლე პენმა საღამოს განაცხადა, რომ ეს „ისტორიული გამარჯვება“ და მნიშვნელოვანი ეტაპია. მან თქვა: „შედეგებმა ჩვენს ყველა მოლოდინს გადააჭარბა. გარღვევა ყოვლისმომცველია და ადასტურებს, რომ „ეროვნული გაერთიანება“ მთელი ქვეყნის ტერიტორიაზე სულ უფრო ფართოდ ვრცელდება“.

საპრეზიდენტო არჩევნებამდე ცოტა ხნით ადრე RN-ის გაძლიერებას ძალაუფლების განაწილებაზე მეტად სიმბოლური მნიშვნელობა აქვს. 2024 წლის საპარლამენტო არჩევნების შემდეგ RN უფრო მნიშვნელოვან ეროვნულ ასამბლეაში უდიდეს ფრაქციას ქმნის. სენატის არჩევნების შედეგებმა მომავალ არჩევნებამდე ლე პენისა და მისი პარტიის პოზიციები გაამყარა.

სენატი 348 წევრისგან შედგება, რომლებსაც ექვსი წლით ირჩევენ. ყოველ სამ წელიწადში ადგილების დაახლოებით ნახევარი ახლდება. სენატორებს არაპირდაპირი წესით ირჩევენ. კენჭისყრაში მონაწილეობის უფლება დაახლოებით 93 500 მუნიციპალურ და რეგიონულ პოლიტიკოსს ჰქონდა. სენატი კანონშემოქმედებაში მონაწილეობს, თუმცა ეროვნულ ასამბლეასთან უთანხმოებისას ქვედა პალატის გადაწყვეტილებას უნდა დაემორჩილოს. არჩევნების ოფიციალური საბოლოო შედეგები ორშაბათს გამოქვეყნდება.

მომავალ გაზაფხულზე ლე პენის პრეზიდენტად არჩევა იმაზეა დამოკიდებული, თუ ვინ იყრის კენჭს სხვა პოლიტიკური ბანაკებიდან. მათ კანდიდატები ჯერ არ შეურჩევიათ. გამონაკლისია საფრანგეთის მემარცხენე პარტია, რომლის კანდიდატიც კვლავ ჟან-ლიუკ მელანშონია. ლე პენს მეორე ტურში გასვლის კარგი შანსი აქვს: გამოკითხვებში ის თვეებია 30%-ზე მეტი მხარდაჭერით აშკარად ლიდერობს.

თუმცა ლე პენს შესაძლოა ევროკავშირის თანხების მითვისებისთვის გამოტანილმა განაჩენმა ხელი შეუშალოს. ლე პენმა განაჩენი გაასაჩივრა. იმის მიხედვით, თუ რამდენად სწრაფად მიიღებს სასამართლო გადაწყვეტილებას, 58 წლის პოლიტიკოსს შესაძლოა საარჩევნო კამპანიის დროს ელექტრონული სამაჯურის ტარება და გადაადგილების შეზღუდვა დაეკისროს. პრეზიდენტად შესაძლო არჩევის შემდეგ ლე პენი იმუნიტეტით ისარგებლებს.

ფრანსუა ოლანდმა თავის დროზე პრეზიდენტის თანამდებობა ცუდი რეპუტაციით დატოვა. ახლა 72 წლის სოციალ-დემოკრატი დაბრუნების შესაძლებლობას ხედავს: მას სურს, საფრანგეთი მარინ ლე პენისგან იხსნას.