ნეთანიაჰუ უარყოფს, რომ ეგვიპტემ ჰამასის თავდასხმის შესახებ გააფრთხილა

რა იცოდა პრემიერ-მინისტრმა ბენიამინ ნეთანიაჰუმ ისრაელზე ჰამასის 2023 წლის 7 ოქტომბრის თავდასხმის გეგმების შესახებ? ეს საკითხი ქვეყანაში კვლავ განიხილება. მიზეზი ამერიკული ჟურნალის, The Atlantic-ის, გამოძიებაა. მანამდეც ვრცელდებოდა ცნობები, რომ ნეთანიაჰუ თავდასხმის შესახებ გააფრთხილეს.

ახალი მასალა ისრაელის, ეგვიპტისა და სხვა არაბული ქვეყნების ხელისუფლების წარმომადგენლებს ეყრდნობა. წყაროებს შორის აშშ-ისა და ევროპის წარმომადგენლებიც არიან. The Atlantic-ი წერს, რომ ეგვიპტის მაშინდელმა დაზვერვის ხელმძღვანელმა, აბას კამელმა, ისრაელი 7 ოქტომბრამდე 11 დღით ადრე მოსალოდნელი ესკალაციის შესახებ გააფრთხილა. ამ მიზნით კამელი საგანგებოდ ისრაელში გაფრინდა. მისი თვითმფრინავი ბენ-გურიონის აეროპორტში 67 წუთის განმავლობაში იმყოფებოდა. თუმცა გაფრთხილება თავდასხმის კონკრეტულ თარიღსა და ოპერატიულ დეტალებს არ შეიცავდა.

ნეთანიაჰუმ თავდასხმიდან მალევე უარყო, რომ ეგვიპტემ გააფრთხილა. The Atlantic-ის მასალის გამოქვეყნების შემდეგ ნეთანიაჰუს ოფისმა კვლავ განაცხადა, რომ მტკიცება მცდარია. ოფისის ცნობით, ბრალდება თავის დროზეც უარყვეს, ახლა კი ისრაელის საზოგადოების შეცდომაში შესაყვანად კვლავ გაავრცელეს.

ნეთანიაჰუს ოფისის განცხადებით, მთავრობის მეთაური კამელს არც ესაუბრა და არც შეხვედრია. მას არც შესაბამისი სადაზვერვო გაფრთხილება მიუღია. თუმცა The Atlantic-ის ცნობით, ეგვიპტე დამატებით გაფრთხილებებს თავდასხმამდე ორი დღით ადრეც გზავნიდა.

მასალა აძლიერებს კამათს, თუ რა ინფორმაცია ჰქონდა ისრაელს 7 ოქტომბრამდე. ისრაელის გაზეთმა Haaretz-მა სამი კვირის წინ გაავრცელა ცნობა, რომ ისრაელმა ჰამასის თავდასხმის შესახებ გაფრთხილებები უგულებელყო.

Haaretz-ის ცნობით, არაბთა გაერთიანებული საამიროების პრეზიდენტმა მოჰამედ ბინ ზაიდმა ნეთანიაჰუს 2023 წლის სექტემბრის ბოლოს დაურეკა. საუბრისას მან ჰამასის მოსალოდნელი მასშტაბური თავდასხმის შესახებ დაჟინებით გააფრთხილა. ნეთანიაჰუს მრჩეველმა ტოპაზ ლუკმა Haaretz-ის ცნობა უარყო და მას წინასაარჩევნო ხმაური უწოდა: „ასეთი საუბარი არ ყოფილა, ასეთი გაფრთხილება არავის გაუკეთებია“. ნეთანიაჰუმ გაზეთის წინააღმდეგ ცილისწამების გამო სარჩელის შეტანა დააანონსა.

2023 წლის 7 ოქტომბერს ჰამასის ტერორისტები ისრაელს თავს დაესხნენ. მათ თითქმის 1 200 ადამიანი მოკლეს და დაახლოებით 250 მძევალი ღაზის სექტორში გაიტაცეს. ამის შემდეგ ისრაელმა ჰამასის წინააღმდეგ ომი დაიწყო. ათიათასობით ადამიანი დაიღუპა, მათ შორის ბევრი მშვიდობიანი მოქალაქე. თითქმის ერთი წლის წინ შეთანხმებული ცეცხლის შეწყვეტის მიუხედავად, ისრაელი ღაზის სექტორში სამიზნეებს კვლავ უტევს.

ოპოზიციონერი პოლიტიკოსები და თავდასხმის მსხვერპლები დიდი ხანია ოფიციალური საგამოძიებო კომისიის შექმნას ითხოვენ. პრემიერ-მინისტრი ნეთანიაჰუ ამ მოთხოვნას აქამდე ყოველთვის უარყოფდა.