პენტაგონმა ირანის ომში აშშ-ის სამხედროების მსხვერპლი 19-მდე გაზარდა

ვაშინგტონ პოსტის (The Washington Post) ცნობით, ცვლილება ქალი სამხედრო ოფიცრის გარდაცვალებას მოჰყვა. ახლო აღმოსავლეთში მგზავრობისას მას პარასკევს ჯანმრთელობის გადაუდებელი, სასიკვდილო პრობლემა შეექმნა.

აშშ-ის თავდაცვის უწყების წარმომადგენელმა, რომელმაც ანონიმურობის დაცვა მოითხოვა, გამოცემას განუცხადა, რომ შემთხვევა ბაზაში ორშაბათის შუადღის შემდეგ შეიტანეს. გარდაცვალების შესახებ თავდაპირველად გამოცემა Task & Purpose-მა გაავრცელა ინფორმაცია. ოფიცრის ვინაობა არ გამოუქვეყნებიათ.

ამ შემთხვევის დამატებით, თავდაცვის უწყების მსხვერპლის ანალიზის სისტემაში (Defense Casualty Analysis System), ანუ DCAS-ში, აღრიცხულ დაღუპულთა რაოდენობა 18-დან 19-მდე გაიზარდა. კვირის დასაწყისში ბაზაში 18 შემთხვევა იყო შეტანილი. მასში ასევე აღრიცხულია საბრძოლო მოქმედებებისას დაჭრილი 820-ზე მეტი სამხედრო.

თუმცა მოქმედი და ყოფილი ოფიციალური პირები აცხადებენ, რომ საჯარო მონაცემები კვლავ არასრულია. გასულ კვირას აშშ-ის ხუთმა ოფიციალურმა პირმა გამოცემას უთხრა, რომ 28 თებერვალს სამხედრო მოქმედებების დაწყების შემდეგ რეგიონში სულ მცირე 22 სამხედრო დაიღუპა. მეექვსე ოფიციალურმა პირმა 23 დაღუპული დაასახელა.

აღურიცხავ შემთხვევებს შორისაა რეგიონში აქტიური საბრძოლო მოქმედებების დროს განთავსებული სამხედროების დაღუპვაც, თუნდაც ისინი უშუალოდ ბრძოლაში არ დაღუპულიყვნენ.

აღრიცხვაში შეუსაბამობების შესახებ გავრცელებული ცნობების საპასუხოდ, თავდაცვის მინისტრმა პიტ ჰეგსეთმა განზრახ გამოტოვების ბრალდებები უარყო.

ჰეგსეთმა განაცხადა: „საბრძოლო მოქმედებისას დაღუპვის დამალვა რომც გვდომოდა, ამას არასოდეს გავაკეთებდით და ვერც შევძლებდით“.

თავდაცვის დეპარტამენტის მიერ გამოყენებული აღრიცხვის მეთოდები მთელი კონფლიქტის განმავლობაში ყურადღების ქვეშ მოექცა. ამ წლის დასაწყისში საბრძოლო მოქმედებებისას დაღუპული ოთხი სამხედრო ოფიციალურ მონაცემებში დროებით არ შეიტანეს.

მსხვერპლის რაოდენობებს შორის სხვაობა მხოლოდ საჯარო აღრიცხვას არ ეხება და ლოჯისტიკურ შედეგებსაც იწვევს. ყოველი გარდაცვალებისას სამხედრო უწყება ოფიციალურ გამოძიებას ატარებს. მან უნდა დაადგინოს, მოხდა თუ არა სიკვდილი სამხედრო მოვალეობის შესრულებისას. ეს სტატუსი პირდაპირ განსაზღვრავს სამხედროების ოჯახებისთვის გამოყოფილ ფინანსურ დახმარებას.

DCAS-ში აღრიცხული შემთხვევებიდან 14 ოპერაცია „ეპიკური რისხვის“ კატეგორიას მიეკუთვნება. ეს ირანის წინააღმდეგ სამხედრო კამპანიისთვის ადმინისტრაციის მიერ მინიჭებული ოფიციალური სახელწოდებაა.

კიდევ ხუთი შემთხვევა ცალკე, „საზღვარგარეთული ოპერაციების“ კატეგორიაშია შეტანილი. მათ შორისაა ქალი ოფიცერი, რომლის მონაცემებიც ამ კვირაში დაამატეს. ეს კატეგორია ივლისში ხანმოკლე ცეცხლის შეწყვეტის დარღვევის შემდეგ დაღუპულებს მოიცავს.