პოლონეთმა Starlink-ის სადგურზე ხანძარი დივერსიად შეაფასა

გავკოვსკიმ, რომელიც ციფრულ საკითხთა მინისტრიცაა, საზოგადოებრივ მაუწყებელ TVP-ს განუცხადა: „ეს დივერსია სადგურის გასათიშად შეგნებულად დაიგეგმა, რათა სხვადასხვა დაწესებულებისთვის, მათ შორის უკრაინის არმიისთვის, ინტერნეტზე წვდომა შეფერხებულიყო“.

მისი თქმით, პოლონეთის სახელმწიფო სატელეკომუნიკაციო კომპანია Exatel-ის სადგურზე ხანძარი ოთხშაბათს გვიან გაჩნდა.

გავკოვსკიმ თქვა: „ბევრი რამ მიუთითებს, რომ საქმე ჰიბრიდული ომის მომდევნო ეტაპის ერთ-ერთ ელემენტთან გვაქვს“.

ვიცე-პრემიერის თქმით, სადგურს პოლონეთის გავლით, მათ შორის მეზობელ უკრაინაში, ინტერნეტტრაფიკის გადასაცემად იყენებდნენ.

მან ასევე აღნიშნა, რომ მრავალი ნიშანი მიუთითებს, რომ ინციდენტი „თავდასხმის ამ ახალ რუსულ დოქტრინას შეესაბამება“.

მას შემდეგ, რაც მოსკოვმა 2022 წლის თებერვალში სრულმასშტაბიანი შეჭრა დაიწყო, პოლონეთი და ევროკავშირისა და ნატოს სხვა წევრი ქვეყნები რუსეთს უკრაინის მოკავშირეების წინააღმდეგ ჰიბრიდულ ომში, მათ შორის დივერსიებში, ადანაშაულებენ.

ევროკავშირისა და ნატოს აღმოსავლეთ ფლანგზე მდებარე პოლონეთს უკრაინა, რუსეთის ექსკლავი კალინინგრადი და მოსკოვის მოკავშირე ბელარუსი ესაზღვრება. პოლონეთი ევროპაში კიევის ერთ-ერთი ყველაზე ძლიერი მხარდამჭერია.

ვარშავა ასევე შეუერთდა ახალ რეგიონულ სამიტს, „კარპატების რვიანს“, რომელიც უკრაინამ გასულ პარასკევს წამოიწყო.

სექტემბრის დასაწყისში პოლონეთის პრემიერ-მინისტრმა დონალდ ტუსკმა გააფრთხილა, რომ რუსეთი უკრაინის მოკავშირეებზე „ჰიბრიდულ“ დრონებითა და რაკეტებით დარტყმებს გეგმავს.

გასული წლის ბოლოს პოლონეთმა რუსეთი სარკინიგზო ქსელში მოწყობილი დივერსიის გამო „სახელმწიფო ტერორიზმში“ დაადანაშაულა.