როდრიგო დუტერტე ჰააგის სასამართლოში პირველად გამოცხადდა

დუტერტეს ბრალი ნარკოტიკების წინააღმდეგ მის სისხლიან ომთან დაკავშირებით ედება. ამ კამპანიის დროს ათიათასობით წვრილი ნარკომოვაჭრე, სავარაუდოდ, სასამართლოს გარეშე სიკვდილით დასაჯეს.

ოთხშაბათს 81 წლის დუტერტეს მუქი კოსტიუმი და თეთრი პერანგი ეცვა. მანილის აეროპორტში 18 თვის წინ დაკავების შემდეგ ის პირადად პირველად გამოჩნდა. დუტერტეს არ უსაუბრია, თუმცა სხდომის დასრულებისას საჯარო გალერეაში მყოფ ოჯახის წევრებს ხელი დაუქნია.

აქამდე დუტერტე სასამართლოს სხდომებს ვიდეოკავშირით ესწრებოდა, შემდეგ კი რამდენიმე სხდომა გამოტოვა.

დუტერტეს ადვოკატებმა განაცხადეს, რომ ჯანმრთელობის გაუარესების გამო ყოფილ ლიდერს სასამართლოს წინაშე წარდგომა არ შეეძლო. ამის შემდეგ სისხლის სამართლის საერთაშორისო სასამართლომ ოთხშაბათს საქმის მდგომარეობის განსახილველად სხდომა დანიშნა.

პირველი სასამართლო განხილვა 30 ნოემბერსაა დანიშნული.

ნარკოტიკების წინააღმდეგ ომი დუტერტეს პრეზიდენტობის მთავარი მიმართულება იყო. ის ქვეყანას 2016-დან 2022 წლამდე ხელმძღვანელობდა. დუტერტე ამტკიცებდა, რომ ეკონომიკის ზრდისთვის მშვიდობა და წესრიგი აუცილებელი იყო.

სასამართლო იძიებს მკვლელობებს, რომლებიც 2011 წლის 1 ნოემბრიდან 2019 წლის 16 მარტამდე მოხდა. ამ პერიოდის დასაწყისში დუტერტე სამხრეთის დიდ ქალაქ დავაოს მერი იყო. პერიოდი დასრულდა, როცა მან ფილიპინები სისხლის სამართლის საერთაშორისო სასამართლოდან გაიყვანა.

დუტერტეს ადვოკატმა პიტერ ჰეინსმა ცოტა ხნის წინ სასამართლოს განუცხადა, რომ მის კლიენტს „მეხსიერების მნიშვნელოვანი დარღვევა“ ჰქონდა. მისი თქმით, ამის გამო დუტერტე საკუთარ იურიდიულ გუნდთან თანამშრომლობას ვერ ახერხებდა. პროკურორები ამ მოსაზრებას არ დაეთანხმნენ.

მოსამართლეები განიხილავენ, შეუძლია თუ არა დუტერტეს ფსიქიკური მდგომარეობის გათვალისწინებით სასამართლოს წინაშე წარდგომა. მათ სამ სპეციალისტს სამედიცინო შეფასების ჩატარება დაავალეს.

შეფასება საჯაროდ არ გამოქვეყნებულა. თუმცა AFP-ის ცნობით, დაცვის ადვოკატები ამბობენ, რომ დუტერტეს 2007 ან 2008 წელს ჰგონია თავი. მას ასევე ჰგონია, რომ 84 ან 85 წლისაა. შეფასებისას მან დონალდ ტრამპის სახელის გახსენებაც ვერ შეძლო.

დუტერტეს სასტიკი ანტინარკოტიკული კამპანიის დროს მოკლული ადამიანების ნათესავები პროცესს მანილაში პირდაპირი ეთერით უყურებდნენ.

ლორე პასკომ, რომელმაც ორი ვაჟი დაკარგა, როიტერსს განუცხადა: „ბედნიერები ვართ, რომ საბოლოოდ გამოცხადდა და კარგად გამოიყურება. სინამდვილეში, თითქოს წონაც მოიმატა“.

რენდი დელოს სანტოსმა, რომლის მოზარდი ძმისშვილი 2017 წელს მოკლეს, AFP-ს უთხრა, რომ დუტერტეს სასამართლოში ხილვით კმაყოფილი იყო. მან დასძინა: „ვიმედოვნებთ, რომ მისი კარგი ფიზიკური მდგომარეობა სხდომების დაჩქარებას შეუწყობს ხელს“.