რუსეთი უკრაინის წიგნის ბაზარს უტევს

კიევის ერთ-ერთ წიგნის მაღაზიაში ევჰენია რიბაკს პატარა მინის ყუთი უჭირავს. შიგნით ნახევრად დამწვარი საბავშვო წიგნია. წიგნის მაღაზია „რიდითმა“ (Readeat), სადაც ევჰენია მუშაობს, ის შეინახა. ეს ერთ-ერთია იმ რვა წიგნიდან, რომლებიც მაღაზიის ცენტრალურ საწყობში გაჩენილი დიდი ხანძრის შემდეგ ჯერ კიდევ ცნობადი იყო. დანარჩენი წიგნები მთლიანად დაიწვა.

ევჰენია რიბაკმა თქვა: „როცა ლიტერატურას ანადგურებენ, სასოწარკვეთილება გეუფლება. თითქოს შენი ნაწილის განადგურება სურთ. ამას ვერ ახერხებენ, მაგრამ მაინც მტკივნეულია. თითოეულ გვერდში უამრავი ადამიანის შრომაა ჩადებული. ასეთი წიგნები ბავშვებს ელოდნენ და ბავშვებიც მათ ელოდნენ“.

მაღაზიის პირველ სართულზე სავარძლები, მაგიდები და ყავაა, რაც სტუმრებს დასვენების საშუალებას აძლევს. თაროები სავსეა, თუმცა ამჟამად ყველა წიგნი ხელმისაწვდომი არ არის. ევჰენია, რომელიც აქ მარკეტინგს ხელმძღვანელობს, მონიტორზე მომხმარებლებისთვის განკუთვნილ შეტყობინებაზე მიუთითებს. ახლა მათ მიწოდებისთვის 15 დღე უნდა მოიცადონ, მაშინ როცა „რიდითი“ შეკვეთებს ადრე 24 საათში აწვდიდა.

ევჰენიამ რამდენიმე ხნის წინ წიგნები თავისთვისაც შეუკვეთა. თუმცა ახლა არც კი იცის, კვლავ მოიპოვება თუ არა ისინი. მან თქვა: „გამომცემლობებმა ზუსტად არ იციან, რა დაიწვა და კიდევ რა აქვთ სადმე დარჩენილი. თუმცა, შესაძლოა, გამიმართლოს და ამ წიგნების დაბეჭდილი ეგზემპლარები სადმე ჯერ კიდევ იყოს“.

ბოლო ორნახევარი თვის განმავლობაში რუსეთის საჰაერო თავდასხმებმა 13 მილიონზე მეტი უკრაინული წიგნი დაწვა. ეს წელს უკრაინაში დაბეჭდილი ყოველი მესამე წიგნია.

უკრაინის პენ-კლუბის (PEN Club) თავმჯდომარე ვოლოდიმირ ერმოლენკო ამას შემთხვევითობად არ მიიჩნევს. მან თქვა: „რუსებს უკრაინის დამორჩილება სურთ. ამას მხოლოდ მაშინ შეძლებენ, თუ ეროვნული თვითშეგნება აღარ გვექნება. მათ სურთ, აღარ ვგრძნობდეთ, რომ განსხვავებულები ვართ და საკუთარი კულტურა გვაქვს. ამიტომ ჩვენს კულტურასა და იდენტობას ანადგურებენ. რუსებს ეს ჩვენს ისტორიაში უკვე ბევრჯერ გაუკეთებიათ“.

ვოლოდიმირ ერმოლენკომ გაიხსენა, რომ რუსეთის იმპერიაში უკრაინული ენა ჯერ კიდევ მე-19 საუკუნეში აკრძალეს.

კიევში, „რიდითის“ თაროებს შორის ახალგაზრდა კაცი სეირნობს. მაქსიმ სიუსურამ თქვა, რომ ადრე რუსული ლიტერატურა მეტად აინტერესებდა. რუსეთის მასშტაბური შეჭრის შემდეგ ის მხოლოდ უკრაინელ ავტორებს კითხულობს. მას უკრაინული გამომცემლობების მიზანმიმართულად მხარდაჭერაც სურს.

მაქსიმ სიუსურამ თქვა: „გამომცემლობების საწყობებზე თავდასხმის მომდევნო კვირაში მაღაზიაში წავედი და მაშინვე ორი წიგნი ვიყიდე“. მას ახლაც სურს კიდევ ერთი წიგნის ყიდვა, თუმცა ხელფასი უგვიანდება. მან დასძინა: „უკრაინულ წიგნებს მეგობრებსა და ნაცნობებთანაც რეკლამას ვუწევ“.