რუსეთის დარტყმების შემდეგ უკრაინაში ათასობით ოჯახი ელექტროენერგიის გარეშე დარჩა

უკრაინის პრეზიდენტმა ვოლოდიმირ ზელენსკიმ კვირას განაცხადა, რომ რუსეთის დარტყმების შედეგად ათასობით ოჯახი ელექტროენერგიის გარეშე დარჩა.

ზელენსკიმ სოციალურ ქსელში დაწერა: „მხოლოდ ღამით რუსეთის თავდასხმის სამიზნე ოთხ რეგიონში ჩვენი ენერგეტიკული ინფრასტრუქტურა გახდა: დნიპროში, ვინიცაში, ჟიტომირსა და ხმელნიცკიში. თავდასხმის სამიზნე გახდა ქვესადგურები, ტრანსფორმატორები და ელექტროგადამცემი ხაზები, რომლებითაც ჩვენს ხალხს სახლებში ელექტროენერგია მიეწოდება“.

ზელენსკიმ დასძინა: „ამ დროისთვის ასობით ათასი ოჯახი კვლავ ელექტროენერგიის გარეშეა“. მან აღნიშნა, რომ „დარტყმების ინტენსივობა უკიდურესად მაღალია“.

ზელენსკის განცხადება მას შემდეგ გაკეთდა, რაც რუსეთის ხელისუფლებამ განაცხადა, რომ ნიჟნი ნოვგოროდის ოლქში მდებარე სამრეწველო ობიექტზე ღამით უკრაინამ „მასშტაბური“ დრონებით შეტევა განახორციელა.

ოლქის გუბერნატორმა გლებ ნიკიტინმა კვირას ტელეგრამზე დაწერა: „ნიჟნი ნოვგოროდის ოლქში ღამით და დღეს დილით დრონებით მასშტაბური შეტევა მოხდა: ასზე მეტი დრონი ჩამოაგდეს“.

ნიკიტინის თქმით, „წინასწარი ინფორმაციით, მსხვერპლი არ ყოფილა“. მან დასძინა, რომ კსტოვოს რაიონში მდებარე სამრეწველო ობიექტმა „მნიშვნელოვანი ზიანი“ მიიღო.

ნიკიტინმა დაწერა: „აღდგენითი სამუშაოების მიმდინარეობისას, საცხოვრებელი სახლების მომმარაგებელი კომუნალური ქსელების ცალკეულ მონაკვეთებზე შესაძლოა დროებით შეწყდეს ელექტროენერგიის მიწოდება და შემცირდეს ცხელი წყლისა და გათბობის მიწოდება“.

ნიკიტინს არ დაუკონკრეტებია, რომელ სამრეწველო ობიექტზე მოხდა თავდასხმა. რეგიონში ნორსის ნავთობგადამამუშავებელი ქარხანა მდებარეობს.

პარასკევს რუსეთის სამარის ოლქის გუბერნატორმა უკრაინა დაადანაშაულა ქალაქ ნოვოკუიბიშევსკში მდებარე ნავთობგადამამუშავებელ ქარხანაზე გამთენიისას დრონით თავდასხმაში.

უოლ სტრიტ ჯორნალის (The Wall Street Journal) ცნობით, კიევი დათანხმდა, რომ რუსეთის ნავთობგადამამუშავებელ ქარხნებზე დარტყმები აშშ-ის შუალედური არჩევნების შემდეგ, 3 ნოემბრამდე, შეეჩერებინა. გამოცემა წერს, რომ ეს გადაწყვეტილება აშშ-ის პრეზიდენტ დონალდ ტრამპის ზეწოლის შედეგად მიიღეს.

ოქტომბერში, მას შემდეგ, რაც ტრამპმა ენერგეტიკული ზავის შესახებ გამოაცხადა, უკრაინამ რუსეთის ნავთობგადამამუშავებელ ქარხნებზე დრონებით დარტყმები 72 საათით შეაჩერა. თუმცა კრემლი უკრაინის ენერგეტიკულ ინფრასტრუქტურაზე თავდასხმას განაგრძობდა.