რუსეთის იერიშებს უკრაინაში ერთი ადამიანი ემსხვერპლა, 11 დაშავდა

რუსეთის სამხედრო ძალები 22 სექტემბრის საღამოდან კიევს, ზაპოროჟიესა და ხარკოვის რეგიონს დრონებითა და ავიაბომბებით უტევენ.

რუსეთის ძალები უკრაინის დედაქალაქის რამდენიმე რაიონს თავს დაესხნენ. სოლომიანსკის რაიონში სატრანსპორტო კომპანიის ობიექტზე ხანძარი გაჩნდა. ჰოლოსიივსკის რაიონში საწყობს ცეცხლი გაუჩნდა, ხოლო რუსეთის დრონები ბენზინგასამართ სადგურს დაეჯახნენ. დარნიცკის რაიონში იერიშის შედეგად კიდევ ერთი ბენზინგასამართი სადგურის სახურავს ცეცხლი გაუჩნდა. დრონი სატრანსპორტო ობიექტსაც დაეჯახა. წინასწარი ინფორმაციით, ერთი ადამიანი დაშავდა.

ზაპოროჟიეზე რუსეთის დარტყმის შედეგად ქალაქის ერთ-ერთ სავაჭრო ცენტრში ხანძარი გაჩნდა. ხანძრის ამსახველ ფოტოებზე, სავარაუდოდ, სავაჭრო ცენტრი „ამსტორი“ (Amstor) ჩანს. ორი ადამიანი დაშავდა.

რუსეთის ძალებმა ხარკოვის რეგიონში მდებარე იზიუმს ავიაბომბებით შეუტიეს. საცხოვრებელი კორპუსები დაზიანდა, ხოლო დარტყმის ადგილზე ხანძარი გაჩნდა. რვა ადამიანი, მათ შორის ერთი ბავშვი, დაშავდა. იმავე საღამოს რუსეთის დრონებმა ხარკოვის კიევსკის რაიონში ავტომობილებს არაერთხელ დაარტყეს. ერთი ადამიანი დაიღუპა.