რუსეთის თავდასხმის შემდეგ კიევის მეცნიერებათა აკადემია იწვის

უკრაინის პრეზიდენტმა ვოლოდიმირ ზელენსკიმ განაცხადა, რომ კიევში მეცნიერებათა ეროვნული აკადემიის ისტორიული შენობა იწვის. მისი თქმით, სამაშველო ოპერაცია მიმდინარეობს. მაშველები იმ ადამიანებს ეძებენ, რომლებიც შესაძლოა შენობაში იმყოფებოდნენ. ზელენსკიმ ვიდეოც გამოაქვეყნა, რომელშიც შენობასა და მის გარშემო ხანძარი და მძიმე დაზიანებები ჩანს.

ადგილზე მაშველები მუშაობენ. სულ მცირე ორი ადამიანი დაიღუპა. უკრაინულმა მედიამ გაავრცელა ვიდეოები, რომლებშიც აკადემიის შიგნით ხანძარი ჩანს. კადრებში ადამიანები ზედა სართულებზე ცეცხლს ფანჯრის რაფებზე აფარებენ თავს და მეხანძრეებისგან შველას ელოდებიან.

დრონებით თავდასხმები უკრაინაში ომის ახალი ყოველდღიურობის ნაწილია. რუსეთი საჰაერო თავდასხმებს უკვე თვეზე მეტია აძლიერებს. განსაკუთრებული სამიზნე კიევია. მოსკოვი ღამით ქვეყნის რამდენიმე რეგიონს თავს დაესხა და დღისით დაბომბვა განაგრძო. რამდენიმე ადგილას ადამიანები დაიღუპნენ.

ხარკივის მერის, იჰორ ტერეხოვის თქმით, ქვეყნის აღმოსავლეთში მდებარე ქალაქზე რუსეთის თავდასხმებისას 24-ზე მეტი ადამიანი დაშავდა. რუსეთმა პლანირებადი ავიაბომბები გამოიყენა. რეგიონული ხელისუფლების ცნობით, ოდესის რეგიონში პალაუს დროშით მცურავი გემი დაზიანდა და ორი ადამიანი დაშავდა.

პრეზიდენტმა ზელენსკიმ პლატფორმა X-ზე დაწერა, რომ რუსეთს პასუხისმგებლობა უნდა დაეკისროს და რეალური შედეგები უნდა იგრძნოს. მან მოსკოვი ტერორში დაადანაშაულა.

რუსეთი ბოლო პერიოდში თავდასხმებს არაერთხელ, რამდენიმე საათის განმავლობაში ახორციელებდა. ხანძრები, აფეთქებები და საჰაერო თავდაცვის სროლა ბევრი ადამიანისთვის ყოველდღიურობის ნაწილად იქცა. უნივერსიტეტებს, სკოლებს, სახელმწიფო დაწესებულებებსა და უწყებებს მუშაობის რამდენიმე საათით შეწყვეტა ხშირად უწევთ. თავდასხმების მთავარი სამიზნეები ახლა ბენზინგასამართი სადგურები, სუპერმარკეტების საწყობები და მონაცემთა ცენტრებია. მობილური კავშირის ოპერატორები ბოლო პერიოდში ინტერნეტის შეფერხებების გახშირების შესახებ იტყობინებოდნენ.

მოსკოვში რუსეთის თავდაცვის სამინისტრომ თავდასხმების ბოლო ტალღის დროს კიევის მონაცემთა ცენტრებზე დარტყმაც დაადასტურა. უწყების განმარტებით, ცენტრები უკრაინის შეიარაღებულ ძალებს მობილური კავშირითა და ინტერნეტით უზრუნველყოფდნენ. სამინისტროს ცნობით, ოდესის რეგიონში, სხვა ობიექტებთან ერთად, ლოგისტიკურ ცენტრსა და გემს შეუტიეს. უწყების მტკიცებით, გემს უკრაინის სამხედროებისთვის განკუთვნილი ტვირთი გადაჰქონდა. ამ ინფორმაციის დამოუკიდებლად გადამოწმება ამჟამად შეუძლებელია.

ზელენსკის თქმით, უკრაინა, თავის მხრივ, რუსეთის შიდა ტერიტორიაზე მდებარე სამიზნეებს დაესხა თავს. მათ შორისაა ტულისა და ვორონეჟის რეგიონების ორი სამხედრო საწარმო და კრასნოდარის მხარის ნავთობის მრეწველობის ობიექტები. უკრაინამ შავ ზღვასა და ბრიანსკის რეგიონშიც შეუტია სამიზნეებს. ამ ცნობების დამოუკიდებლად გადამოწმებაც ამჟამად შეუძლებელია.