რუსეთში კონტროლირებად საპარლამენტო არჩევნებში კენჭისყრა დაიწყო

რუსეთის მოქალაქეებმა პარასკევს პარლამენტის ქვედა პალატის ასარჩევად ხმის მიცემა დაიწყეს. სამდღიან კენჭისყრაში პრეზიდენტ ვლადიმერ პუტინის პარტიის გამარჯვება თითქმის გარანტირებულია.

ეს პირველი ასეთი არჩევნებია მას შემდეგ, რაც მოსკოვმა 2022 წლის თებერვალში უკრაინაში შესაჭრელად ჯარები გაგზავნა.

არჩევნებში მონაწილეობის უფლება მხოლოდ იმ პარტიებს აქვთ, რომლებიც უკრაინაში პუტინის ომს მხარს უჭერენ. ოპოზიციას არჩევნებში მონაწილეობა აკრძალული აქვს.

პუტინის მარტივად გამარჯვების მოლოდინის მიუხედავად, არჩევნებს ფართოდ განიხილავენ, როგორც რეფერენდუმს მისი სამხედრო კამპანიის გაგრძელებაზე. ეს კამპანია ახლა მეხუთე წელშია.

კენჭისყრა იმ დროს იმართება, როცა საზოგადოებრივი განწყობა ომის წინააღმდეგ იცვლება. ამის მიზეზებია ფასების ზრდა, ინტერნეტის შეზღუდვა, საწვავის დეფიციტი და არჩევნების შემდეგ მობილიზაციის კიდევ ერთი ტალღის შესახებ გავრცელებული ხმები.

ამასთან, პუტინმა კენჭისყრას „უკრაინის წინააღმდეგ რუსეთის გამარჯვებაში კოლექტიური წვლილი“ უწოდა.

სახელმწიფო დუმის 450 წევრის ასარჩევად ხმის მიცემის უფლება რუსეთის 110 მილიონზე მეტ მოქალაქეს აქვს.

პუტინის პარტია „ერთიანი რუსეთი“ ამჟამად ადგილების ორ მესამედზე მეტს აკონტროლებს. მოსალოდნელია, რომ პარტია უპირატესობას შეინარჩუნებს და კლებადი საზოგადოებრივი მხარდაჭერის მიუხედავად, სამხედრო კამპანიას გააგრძელებს.

პარასკევს კენჭისყრა რუსეთის 11 დროის სარტყლიდან პირველად კამჩატკის ნახევარკუნძულსა და ჩუკოტკაში დაიწყო.

საარჩევნო უბნები კვირას გრინვიჩის დროით 18:00 საათამდე ღია დარჩება.

კენჭისყრა პირველად ტარდება რუსეთის მიერ ოკუპირებულ უკრაინულ ტერიტორიებზე: ლუგანსკში, დონეცკში, ზაპოროჟიესა და ხერსონში. ეს კიევის ნების საწინააღმდეგოდ ხდება. შავი ზღვის ნახევარკუნძული ყირიმი, რომლის ანექსიაც მოსკოვმა 2014 წელს მოახდინა, არჩევნებში მეორედ მონაწილეობს.

ამომრჩევლები პარლამენტის წევრებთან ერთად რვა რეგიონში რეგიონული პარლამენტების წევრებსაც აირჩევენ.