სამხრეთ კორეა ირანთან ომში აშშ-ის დასახმარებლად სამხედროებს არ გაგზავნის

ლიმ პარასკევს გამართულ პრესკონფერენციაზე განაცხადა: „არ იქნება ისეთი განთავსება, რომელიც ომში ჩაგვრთავს ან შეგვიყვანს. ამას სრულიად გარკვევით გეუბნებით. ამ მიზნით სამხედრო საშუალებებს არანაირი ფორმით არ განვათავსებთ“.

თუმცა ლიმ დასძინა, რომ რეგიონში ნაოსნობის უსაფრთხოების დასაცავად უფრო დიდი როლის შესრულების საკითხს განიხილავდა. სამხრეთ კორეას მეკობრეობის წინააღმდეგ მისიის ფარგლებში სომალის სანაპიროსთან სამხედრო-საზღვაო ძალები ჰყავს განთავსებული.

ლიმ თქვა: „ისიც ცხადია, რომ სხვა ქვეყნების მსგავსად, მინიმუმი უნდა გავაკეთოთ ჩვენი სავაჭრო გემების, ნედლი ნავთობის გადაზიდვებისა და ჩვენი მოქალაქეების უსაფრთხოების დასაცავად“.

ტრამპმა სეული გააკრიტიკა იმის გამო, რასაც ირანთან ომის არასაკმარის მხარდაჭერას უწოდებდა. მან ამ ზაფხულს ორი ქვეყნის შეიარაღებული ძალების მასშტაბური ერთობლივი სამხედრო წვრთნები შეამცირა. ამ ნაბიჯმა აშშ-ის მოკავშირე შეაშფოთა.

სამხრეთ კორეის მთავრობა ჰორმუზის სრუტეში სამხედრო ძალების შესაძლო განთავსებას განიხილავდა, თუმცა ეს იდეა ქვეყნის შიგნით არაპოპულარული აღმოჩნდა.

ლიმ აშშ-თან მიმდინარე მოლაპარაკებაზეც ისაუბრა. მხარეები ვაშინგტონთან სავაჭრო შეთანხმების ფარგლებში სეულის მიერ აშშ-ში ინვესტირების ვალდებულებებზე თანხმობას ცდილობენ. მისი თქმით, შეთანხმების მთავარი შემაფერხებელი საკითხი პაკეტის კომერციულ სიცოცხლისუნარიანობასთან დაკავშირებული შეშფოთებაა.

ლიმ აღნიშნა, რომ პაკეტი სეულისთვის რთულად მისაღებ ნაწილებს შეიცავდა, თუმცა მხარეები შეთანხმებას უახლოვდებოდნენ.

სამხრეთ კორეამ შარშან აშშ-ის წარმოებაში 350 მილიარდი დოლარის ინვესტირების ვალდებულება აიღო. სანაცვლოდ, ვაშინგტონი კორეულ იმპორტზე საბაჟო ტარიფების 15%-მდე შემცირებას დათანხმდა.

სეულმა ამ კვირაში საინვესტიციო გეგმების შესახებ საპარლამენტო მოსმენა გადადო. მოსმენა, სავარაუდოდ, მომავალ კვირას გაიმართება.

სამხრეთ კორეის პრეზიდენტმა ისიც თქვა, რომ მომდევნო თვეებში ტრამპსა და ჩრდილოეთ კორეის ლიდერ კიმ ჩენ ინს შორის შეხვედრა შესაძლოა გაიმართოს. თუმცა ამისთვის ბევრი გარემოების დამთხვევაა საჭირო.

ლიმ განაცხადა: „ცხადია, რომ პრეზიდენტ ტრამპს მოლაპარაკებები სურს და მეც მსურს, რომ ისინი გაიმართოს. ჩვენ კოორდინაციას ვაგრძელებთ, რათა ჩრდილოეთ კორეასა და აშშ-ს შორის დიალოგი შესაძლებელი გახდეს“.

ჩრდილოეთ კორეის სახელმწიფო მედიას ტრამპის არაერთ მოწოდებაზე ასეთი შეხვედრის გამართვის შესახებ ჯერჯერობით თითქმის არაფერი უთქვამს. უოლ სტრიტ ჯორნალის (The Wall Street Journal) ცნობით, ტრამპი თანაშემწეებს კიმთან შეხვედრის უკვე შემოდგომაზე გამართვისკენ უბიძგებს.