სამხრეთ უკრაინაში რუსულ თავდასხმას ხუთი ადამიანი ემსხვერპლა

სამხრეთ უკრაინაში დაღუპულები, დაშავებულები და მძიმე ზარალია. უკრაინის ცნობით, რუსეთი ავტობუსსა და ორ მატარებელს დრონებით დაესხა თავს. სულ მცირე ხუთი ადამიანი დაიღუპა. პრეზიდენტმა ვოლოდიმირ ზელენსკიმ თავდასხმას „ბარბაროსული აქტი“ უწოდა.

ხელისუფლების ცნობით, სამხრეთ უკრაინაში რუსეთის დრონით თავდასხმისას სამარშრუტო ავტობუსში სულ მცირე ხუთი ადამიანი დაიღუპა. დნიპროპეტროვსკის ოლქის გუბერნატორმა ოლექსანდრ ჰანჟამ Telegram-ზე განაცხადა, რომ სულ მცირე შვიდი მგზავრი დაშავდა.

ჰანჟამ თქვა: „შვიდივე დაშავებული ამჟამად ექიმების მეთვალყურეობის ქვეშაა. ისინი ყველა აუცილებელ დახმარებას იღებენ“. მან რუსეთი ტერორში დაადანაშაულა და დაზიანებული ავტობუსის ფოტოც გამოაქვეყნა, რომელზეც სისხლის კვალი ჩანს.

გუბერნატორის ცნობით, თავდასხმა ფრონტის მახლობლად, ქალაქ ნიკოპოლის შემოგარენში მოხდა. ქალაქი მდინარე დნიპროს გაღმა მდებარე, რუსეთის მიერ ოკუპირებული ტერიტორიიდან რამდენიმე კილომეტრითაა დაშორებული და მას რეგულარულად ბომბავენ.

დნიპროპეტროვსკის საოლქო საბჭოს თავმჯდომარე მიკოლა ლუკაშუკმა განაცხადა, რომ რუსეთის შეიარაღებულმა ძალებმა მიზანმიმართულად შეუტიეს მიკროავტობუსს, რომლითაც მშვიდობიანი მოქალაქეები ყოველდღიურ საქმეებზე მიდიოდნენ. რუსეთს ჯერ კომენტარი არ გაუკეთებია. რუსეთიც და უკრაინაც უარყოფენ, რომ მშვიდობიან მოქალაქეებს მიზანმიმართულად ესხმიან თავს.

უკრაინის ცნობით, თავდასხმის სამიზნე მატარებელიც გახდა. მიკოლაივის ოლქში უკრაინის რკინიგზის კომპანიამ განაცხადა, რომ კიევი-მიკოლაივის მარშრუტზე მოძრავ №122 სამგზავრო მატარებელს დრონი მოხვდა. კომპანიის ცნობით, 170-ვე მგზავრმა უსაფრთხო ადგილას გადასვლა დროულად შეძლო. არავინ დაშავებულა. მატარებელს ცეცხლი გაუჩნდა.

უკრაინის ჩრდილო-დასავლეთში, ვოლინის ოლქის ქალაქ კოველში, ლოკომოტივიც დაზიანდა. რუსეთმა ბოლო დროს მატარებლებსა და სარკინიგზო ობიექტებზე თავდასხმები გაახშირა. უკრაინის განცხადებით, ასობით ლოკომოტივი დაზიანდა ან განადგურდა და მათ ჩანაცვლება სჭირდება.

უკრაინის პრეზიდენტმა ვოლოდიმირ ზელენსკიმ Telegram-ზე თავდასხმას „ბარბაროსული აქტი“ უწოდა. მისი თქმით, აშშ-ისა და ევროკავშირის უფრო მკაცრმა სანქციებმა რუსეთი უაზრო ომის დასრულება უნდა აიძულოს. ზელენსკიმ გააფრთხილა, რომ სანქციების შემსუბუქებით აგრესორისთვის დათმობებზე წასვლა დაუშვებელია. მისი თქმით, ახლა ზეწოლის შემცირების დრო არ არის.

უკრაინა ოთხ წელიწად-ნახევარზე მეტია, დასავლეთის სამხედრო დახმარებით რუსეთის თავდასხმითი ომისგან თავს იცავს.