ტრამპმა და ჰეგსეთმა 9/11-ის მემორიალზე ირანთან ომი დაიცვეს

პრეზიდენტი და თავდაცვის მინისტრი ცდილობენ, აშშ-ის ისტორიაში უმძიმესი ტერაქტი მიმდინარე, არაპოპულარულ ომს დაუკავშირონ.

დონალდ ტრამპმა და პიტ ჰეგსეთმა 9/11-ის 25-ე წლისთავის მემორიალურ ცერემონიაზე სიტყვით გამოსვლისას აშშ-ისა და ისრაელის ირანთან ომი დაიცვეს. მათ ასევე მიანიშნეს, რომ სადავო კონფლიქტი აშშ-ის ისტორიაში უმძიმესი ტერაქტის მემკვიდრეობის ნაწილია.

11 სექტემბრის ამგვარ ცერემონიებზე, ჩვეულებრივ, ყურადღება 2001 წლის თავდასხმების მსხვერპლთ ეთმობა. თუმცა აშშ-ის პრეზიდენტმაც და თავდაცვის მინისტრმაც ირანთან ომზე ისაუბრეს, რომელიც ექვს თვეზე მეტი ხნის წინ დაიწყეს და რომლის დასასრულიც არ ჩანს.

ტრამპმა პენტაგონში განაცხადა: „პატივს მივაგებთ აშშ-ის შეიარაღებული ძალების ყველა წევრს, რომელიც „ტერორიზმთან ომში“ მსახურობდა“. გატაცებული თვითმფრინავი პენტაგონს შეეჯახა, რის შედეგადაც ბორტზე მყოფი 64-ვე ადამიანი და შენობაში 125 ადამიანი დაიღუპა. ტრამპმა დასძინა: „ასევე პატივს მივაგებთ სამხედრო მოსამსახურეებს, რომლებიც ახლა მუშაობენ, რათა ტერორიზმის მთავარი სახელმწიფო მხარდამჭერი, ირანის ისლამური რესპუბლიკა, ბირთვულ იარაღს ვერასდროს დაეუფლოს“.

აშშ-ის პრეზიდენტის გადაწყვეტილებამ, ვაშინგტონში დარჩენილიყო, კრიტიკა გამოიწვია. ვიცე-პრეზიდენტი ჯეი დი ვენსი კი ნიუ-იორკში გაემგზავრა, რათა გრუნდ ზიროზე (Ground Zero) გამართულ მემორიალურ ღონისძიებას დასწრებოდა. ამ ადგილას 9/11-ის დროს მსოფლიო სავაჭრო ცენტრი განადგურდა.

სიტყვის დასასრულს ტრამპმა ირანთან ომისა და 9/11-ის ტერაქტების პირდაპირ დაკავშირებაც სცადა. საზოგადოებრივი აზრის გამოკითხვების თანახმად, ეს ომი აშშ-ში უკიდურესად არაპოპულარულია.

ტრამპმა თქვა: „დღეს კვლავ ვდებთ წმინდა ფიცს, რომელიც პირველად მათი სახელით მეოთხედი საუკუნის წინ დავდეთ. ჩვენ არასდროს, არასდროს დავივიწყებთ“. მან დასძინა: „სწორედ ამიტომ ვიბრძვით დღეს. არჩევანი არ გვაქვს. მხოლოდ გამარჯვება შეიძლება არსებობდეს. თავდაუზოგავად ვიბრძვით. გამარჯვებისთვის ვიბრძვით“.

მანამდე აშშ-ის თავდაცვის მინისტრმა პიტ ჰეგსეთმა სამგლოვიარო მემორიალზე საომარი რიტორიკით გაჯერებული სიტყვა წარმოთქვა. ჰეგსეთმა ირანთან ომი „ისლამური თეოკრატიის“ წინააღმდეგ ბრძოლის ნაწილად წარმოაჩინა, რომელსაც „თითქმის ნახევარი საუკუნეა, ჩვენი სიკვდილი სურს“. მან საწინააღმდეგო მტკიცებულებების მიუხედავად განაცხადა, რომ ირანის თავდაცვა „აღარ არსებობს“.

ჰეგსეთმა განაცხადა: „კვლავ ვგზავნით ტერორისტებს იქ, სადაც მათი ადგილია, ჯოჯოხეთში“. მან დასძინა: „ნავთობმზიდებსაც იქ ვგზავნით, სადაც მათი ადგილია, ოკეანის ფსკერზე. უზრუნველვყოფთ, რომ ირანს ბირთვული იარაღი არასდროს ექნება. ეკონომიკური ზეწოლა ყოველდღიურად ძლიერდება“.