წყალდიდობამ ერაყის ჩრდილოეთში ორი ადამიანი იმსხვერპლა

შაბათს ერაყის ჩრდილოეთში ძლიერმა ჭექა-ქუხილმა უეცარი წყალდიდობა გამოიწვია, რომელმაც ორი ადამიანი იმსხვერპლა. სტიქია მეზობელ ირანშიც გავრცელდა. ერაყის ქალაქ ერბილი განსაკუთრებით დაზარალდა, საცხოვრებელი სახლები და ბიზნესი მნიშვნელოვნად დაზიანდა. ხანმოკლე, ძლიერმა წვიმამ ქუჩები დატბორა.

ნალექის რაოდენობამ პროგნოზს გადააჭარბა. ქალაქში, სავარაუდოდ, 80 მმ ნალექი მოვიდა, მაშინ როცა პროგნოზით 30 მმ იყო მოსალოდნელი. წყალდიდობას ორი ადამიანი ემსხვერპლა.

ევროპაში, პროგნოზით, ამ კვირაში პორტუგალიას ძლიერი ქარით შტორმი „ბრუნა“ დაატყდება თავს, განსაკუთრებით ქვეყნის დასავლეთ სანაპიროზე. ქარის სიჩქარე მოსალოდნელია საათში 50 მილი (80 კმ/სთ) იყოს. ასევე მოსალოდნელია ძლიერი წვიმა და ჭექა-ქუხილი. კვირის ბოლომდე ნალექის ჯამურმა რაოდენობამ შესაძლოა 200 მმ-ს მიაღწიოს. შტორმმა კანარის კუნძულებზე უკვე იმოქმედა. ტენერიფეზე შაბათს ღამით ქარის სიჩქარემ საათში 80 მილს მიაღწია.

იაპონიაში გასული კვირის ბოლო ცივი და თოვლიანი იყო. ჰოკაიდოსა და მთავარი კუნძულის, ჰონსიუს, მთიან ნაწილებში კვლავ თოვაა მოსალოდნელი.

იაპონიაში ამ კვირის დასაწყისში ტემპერატურა სეზონურ საშუალო მაჩვენებელზე დაბალი იქნება. ჰოკაიდოს პრეფექტურის დედაქალაქ საპოროში ტემპერატურა ამ მაჩვენებელზე 10 გრადუსით დაბლა დაეცემა. ქალაქში ორშაბათსა და ოთხშაბათს მაქსიმალური ტემპერატურა, სავარაუდოდ, დაახლოებით 4-6 გრადუსი იქნება, სამშაბათს კი დაახლოებით 0 გრადუსია მოსალოდნელი. ოთხშაბათისთვის მინიმალური ტემპერატურა შესაძლოა -6 გრადუსამდე დაეცეს, ჰოკაიდოს დასავლეთ ნაწილებში კი სამშაბათს -8 გრადუსამდე.

პარასკევს დაწყებული თოვის შემდეგ სათხილამურო კურორტები სტუმრების მისაღებად ემზადებიან. კიროროსა და ნისეკოს მიდამოებში მოსალოდნელია 30-50 სმ თოვლი, ფურანოში, რუსუცუსა და საპოროში კი დაახლოებით 20-30 სმ.

ოთხშაბათამდე სხვა კურორტებზე შესაძლოა 20 სმ-მდე თოვლი მოვიდეს. პარასკევსა და შაბათ-კვირას თოვლს ძლიერი ქარიც ახლდა. კიროროსა და ნისეკოში ქარის სიჩქარე საათში დაახლოებით 75 მილს აღწევდა.

ძლიერი ელ-ნინიოს დროს, ოქტომბრის ბოლოს, ეკვატორულ წყნარ ოკეანეში ზღვის ზედაპირზე წყლის ტემპერატურა კლიმატურ საშუალო მაჩვენებელს დაახლოებით 3,5 გრადუსით აღემატებოდა. შედეგად, პერუში ჰაერის ტემპერატურა სეზონურ საშუალო მაჩვენებელზე 5-10 გრადუსით მაღალი იყო. უჩვეულო სითბო, პროგნოზით, მომავალ კვირაშიც შენარჩუნდება.