WSJ: რუსეთმა რობერტ „მადიარ“ ბროვდის დაჭერაზე $20 მილიონი დააწესა

უკრაინის შეიარაღებული ძალების უპილოტო სისტემების ძალებმა უოლ სტრიტ ჯორნალს (The Wall Street Journal) განუცხადა, რომ რუსეთის ხელისუფლებამ 20 მილიონი დოლარის ჯილდო დააწესა. ჯილდო ყოფილ საბჭოთა კავშირში მოქმედი კრიმინალური ქსელების მეშვეობით იმ ინფორმაციისთვის შეთავაზეს, რომელიც ძალების მეთაურის, რობერტ „მადიარ“ ბროვდის ადგილსამყოფლის დადგენას შეუწყობდა ხელს.

ბროვდიმ გაზეთს განუცხადა, რომ გასულ წელს ბრძოლის ველზე რუსული მხარის დანაკარგების დაახლოებით მესამედი დრონების ძალებზე მოდიოდა. მისი თქმით, ომის დაწყების შემდეგ მისმა დანაყოფებმა 79 სამხედრო მოსამსახურე დაკარგეს. თითოეულ დაღუპულ უკრაინელ სამხედროზე მათ 656 რუსი სამხედრო მოკლეს ან დაჭრეს.

მუქარის გამო ბროვდი და მისი სამხედროები უსაფრთხოების დამატებით ზომებს მიმართავენ. ინტერვიუსთვის უოლ სტრიტ ჯორნალის ჟურნალისტს ტელეფონზე ადგილმდებარეობის განსაზღვრის სერვისები უნდა გაეთიშა. მან ტელეფონი ფარადეის ჩანთაში მოათავსა, რომელიც მობილური კავშირის, Wi-Fi-ის, Bluetooth-ისა და GPS-ის სიგნალებს ბლოკავს. ჟურნალისტი სამეთაურო ცენტრში დაბურული მინების მქონე ავტომობილით მიიყვანეს.

ბროვდი წარმოშობით უჟჰოროდიდანაა და უნგრული წარმომავლობა აქვს. ომამდე ის მარცვლეულით ვაჭრობდა. უკრაინაში რუსეთის სრულმასშტაბიანი შეჭრის შემდეგ ბროვდი საბრძოლველად მოხალისედ წავიდა. 2022 წლის მაისში მან საჰაერო დაზვერვის დანაყოფი „მადიარის ჩიტები“ დააარსა. მოგვიანებით დანაყოფი უპილოტო სისტემების 414-ე ცალკეულ ბრიგადად ჩამოყალიბდა.

2025 წლის მაისში ბროვდის უკრაინის გმირის წოდება მიანიჭეს. ერთი თვის შემდეგ ის უკრაინის შეიარაღებული ძალების უპილოტო სისტემების ძალების მეთაური გახდა. რუსეთში მადიარს დაუსწრებლად სამუდამო პატიმრობა მიუსაჯეს. მას 46 სისხლისსამართლებრივი ბრალდება წაუყენეს, მათ შორის „ტერორისტული თავდასხმებისთვის, რომლებმაც მშვიდობიანი მოქალაქეების დაღუპვა და მნიშვნელოვანი ქონებრივი ზიანი გამოიწვია“.