ზელენსკი: კიევსა და ვაშინგტონს ომის ზამთრამდე დასრულება სურთ

ზელენსკი და ტრამპი სამშაბათს ნიუ-იორკში, გაეროს გენერალური ასამბლეის ფარგლებში შეხვდნენ. უკრაინის პრეზიდენტის თქმით, მათ განიხილეს შესაძლო „დეესკალაციის ნაბიჯები, რომლებსაც დიპლომატიისთვის გზის გახსნა შეუძლია“.

ზელენსკიმ სოციალურ ქსელში დაწერა: „ახლახან პრეზიდენტ ტრამპთან დადებითი და პროდუქტიული შეხვედრა მქონდა. აშშ-საც და უკრაინასაც სურთ, რომ რუსეთის ეს უაზრო ომი ზამთრამდე დასრულდეს“.

მან დასძინა, რომ ტრამპთან უკრაინისთვის ზამთრის საჰაერო თავდაცვის პაკეტსა და „სხვა ორმხრივ და მრავალმხრივ საკითხებზეც“ ისაუბრა.

2022 წლის თებერვალში სრულმასშტაბიანი შეჭრის დაწყების შემდეგ რუსეთი უკრაინის ქალაქებსა და რეგიონებს თითქმის განუწყვეტლივ ბომბავს. ზამთრის პერიოდებში ის განსაკუთრებით უკრაინის ენერგეტიკული ინფრასტრუქტურის დაზიანებას ცდილობს.

უკრაინა შორ მანძილზე დარტყმების კამპანიის ფარგლებში რუსეთის ენერგეტიკულ სექტორსაც უტევს. კამპანია რუსეთის ეკონომიკის ერთ-ერთი მთავარი მამოძრავებელი ძალის დასუსტებასა და კრემლის საომარი მანქანისთვის ზიანის მიყენებას ისახავს მიზნად.

ამ სტრატეგიის ფარგლებში უკრაინული ძალები ხშირად უტევენ ნავთობის ობიექტებს, მათ შორის, ნავთობგადამამუშავებელ ქარხნებს, ტერმინალებსა და საცავებს. ზელენსკიმ სამშაბათს განაცხადა, რომ გასული 24 საათის განმავლობაში ერთი ნავთობგადამამუშავებელი ქარხანა ბაშკორტოსტანში, მეორე კი სამარის რეგიონში დაზიანდა.

ტრამპმა ნიუ-იორკში ზელენსკისთან ერთად პრესასთან საუბრისას რუსეთის ენერგეტიკულ ობიექტებზე უკრაინის თავდასხმები შეაფასა. მისი თქმით, ამ თავდასხმებმა რუსეთს „ძალიან სერიოზული დარტყმა“ მიაყენა, თუმცა „დიზელის ფასზეც სერიოზულად იმოქმედა“.

ტრამპმა ორშაბათს განაცხადა, რომ რუსეთმა „უკრაინასთან ომის გამო, სამწუხაროდ, დიზელის ინდუსტრიაზე კონტროლი დაკარგა“. მან ასევე „სასაცილო და დაუსრულებელი“ ომის დასრულებისკენ მოუწოდა.

ტრამპმა Truth Social-ის ანგარიშზე დაწერა: „მათი დიზელის მრავალი ნავთობგადამამუშავებელი ქარხანა ააფეთქეს და ისინი, სულ მცირე, დროებით მწყობრიდან გამოვიდა. მთელი მსოფლიო იტანჯება, რადგან ყოველთვიურად 25 000 ადამიანი, უმეტესად ჯარისკაცი, იღუპება. რა სამარცხვინოა!“

ზელენსკიმ საპასუხოდ აღნიშნა, რომ უკრაინა რუსეთის ენერგეტიკულ ინდუსტრიაზე დარტყმების შესაჩერებლად მზადაა, თუ მოსკოვიც იმავეს გააკეთებს.

ზელენსკიმ X-ზე დაწერა: „უკრაინის ენერგეტიკული სექტორი, კრიტიკული ინფრასტრუქტურა და ჩვენი სურსათის ექსპორტი რუსეთის სამიზნე აღარ უნდა იყოს. ეს ჩვენი მხრიდან შესაბამისი დეესკალაციის ნაბიჯების გადადგმას გამოიწვევს. გამოსავლის პოვნა შესაძლებელია“.