ჯოშუა ვონგს ჰონგკონგში ეროვნული უსაფრთხოების საქმეზე 10 წლით პატიმრობა მიუსაჯეს

ვონგი 30 წლისაა და 2020 წლიდან პატიმრობაშია. ის ჰონგკონგში ერთადერთი აქტივისტია, რომელსაც ეროვნული უსაფრთხოების კანონის საფუძველზე ორჯერ წაუყენეს ბრალი.

ჰონგკონგელ აქტივისტ ჯოშუა ვონგს 10 წლით პატიმრობა მიუსაჯეს. მანამდე მან უცხოეთთან „შეთქმულებაში“ მონაწილეობა აღიარა. ეს მისი მეორე მსჯავრდებაა ეროვნული უსაფრთხოების კანონის საფუძველზე. კრიტიკოსების თქმით, ეს კანონი ქალაქში პოლიტიკური ოპოზიციის გასაჩუმებლად გამოიყენეს.

ვონგი ჰონგკონგში 2014 წლის დემოკრატიის მხარდამჭერი გამოსვლების თინეიჯერი სახე იყო და მაშინ გახდა ცნობილი. მან დანაშაული სექტემბერში აღიარა. მას ბრალად ედებოდა, რომ დევნილ აქტივისტ ნეითან ლოუსთან ერთად მუშაობდა. ისინი უცხო ქვეყნებს ჩინეთისთვის სანქციების, ბლოკადისა თუ სხვა მტრული ზომების დაწესებისკენ მოუწოდებდნენ.

ხუთშაბათს გამოტანილ განაჩენში უმაღლესი სასამართლოს მოსამართლე უილიამ ტამმა ვონგის ქმედებებს „მძიმე ხასიათის“ უწოდა.

მოსამართლემ თქვა, რომ ვონგი 2020 წელს ეროვნული უსაფრთხოების კანონის მიღებამდე აშშ-ში გაემგზავრა, რათა უცხოეთის ჩარევა ეთხოვა. კანონის ამოქმედების შემდეგ კი ის სოციალურ ქსელში ლოუს პოსტებს კვლავ აზიარებდა. ლოუ სანქციების დაწესებისკენ მოუწოდებდა.

მოსამართლის თქმით, ვონგის როლი იყო, „ფარულად მხარი დაეჭირა“ და „უცხო ქვეყნების ყურადღება მიეპყრო საქმის გასაძლიერებლად“. მან ვონგის ქმედებებს უცხოეთის მთავრობებთან შეთქმულების „გეგმის“ ნაწილი უწოდა.

ტამის თქმით, ვონგის ახალი სასჯელი მის წინა, ეროვნული უსაფრთხოების საქმეზე მისჯილი პატიმრობის დარჩენილ ვადასთან ერთად მოიხდება.

განაჩენის შემდეგ ლოუმ განცხადებაში დაწერა: „ძალიან სამწუხაროა, რომ ჩემი მეგობარი ჯოშუა ვონგი ჰონგკონგის დემოკრატიისთვის მშვიდობიანი საქმიანობის გამო კვლავ დაისაჯა.

„ეს განაჩენი მსოფლიოს მიანიშნებს, რომ [ჩინეთი] მზად არის, საკუთარ ტერიტორიაზე თავისუფლებისა და დემოკრატიის ყოველგვარი იმედი ჩაახშოს“.

Amnesty International-ის რეგიონულმა დირექტორის მოადგილემ, სარა ბრუკსმა, თქვა: „დღევანდელი განაჩენი კიდევ ერთი მძიმე შეხსენებაა იმისა, რომ ჰონგკონგის ეროვნული უსაფრთხოების კანონი განსხვავებული აზრის დასასჯელ იარაღად იქცა და არა ეროვნული უსაფრთხოების რეალურად დასაცავად“.

სასამართლოში ვონგს მუქი ლურჯი პერანგი და სქელჩარჩოიანი სათვალე ეკეთა. ის მხარდამჭერებს თავს უკრავდა და ქედს უხრიდა, როცა ისინი ხელს უქნევდნენ. სასამართლოს შენობის გარეთ მოსმენას ათობით ადამიანი ელოდა, პოლიციის გაძლიერებული ყოფნის პირობებში. განაჩენის გამოცხადებას საერთაშორისო დიპლომატების ჯგუფიც ესწრებოდა.