სამხრეთ კორეა ჰორმუზის სრუტესთან საზღვაო ოპერაციებს აფართოებს

სამხრეთ კორეა მეკობრეობის წინააღმდეგ მოქმედი დანაყოფის ოპერაციების გაფართოებას გეგმავს ჰორმუზის სრუტესთან ახლოს მდებარე წყლებში. ამის შესახებ თავდაცვის სამინისტრომ განაცხადა, მას შემდეგ, რაც დონალდ ტრამპმა ირანში მიმდინარე ომის მხარდასაჭერად დახმარების გაწევის მოთხოვნით ზეწოლა გააძლიერა.

მთავრობა პარლამენტს წარუდგენს შუამდგომლობას, რომ ჩონჰეს დანაყოფის მოქმედების არეალი ომანის დუქმის პორტთან მდებარე წყლებამდე გაფართოვდეს. ეს ადგილი სრუტიდან დაახლოებით 650 კმ-ით, ანუ 403 მილით არის დაშორებული. შუამდგომლობას პრეზიდენტ ლი ჯე-მიონგისა და მთავრობის დამტკიცებაც სჭირდება.

თავდაცვის სამინისტროს წარმომადგენელმა ჟურნალისტებს განუცხადა: „ჩონჰეს დანაყოფის მისიის გაფართოების მიზანია ჩვენი მოქალაქეების დაცვა და ეკონომიკური ინტერესების უზრუნველყოფა“.

წარმომადგენლის თქმით, გაძლიერება მხოლოდ არასაბრძოლო მიზნებს ემსახურება, ხოლო დანაყოფი მოკავშირეთა ძალებისგან დამოუკიდებლად იმოქმედებს. მან ვინაობის გამხელის პირობით ისაუბრა.

მისივე თქმით, „ოპერაციები ომანის სამხრეთით, ღია წყლებში დარჩება შეზღუდული. საზღვაო საპატრულო თვითმფრინავებს მისიისას აეკრძალებათ ირანის ტერიტორიის, ტერიტორიული წყლებისა თუ ჰორმუზის სრუტის შიდა ნაწილის დამიზნება ან თვალთვალი“.

ეს გადაწყვეტილება მას შემდეგ მიიღეს, რაც ირანის ისლამური რევოლუციის გვარდიის კორპუსმა განაცხადა, რომ ორ ნავთობმზიდსა და ბუქსირს ცეცხლი გაუჩნდა. ინციდენტები მას შემდეგ მოხდა, რაც გემებმა სრუტის გავლით, დაუშვებელი მარშრუტებით სცადეს გადაადგილება.

გვარდიის ცნობით, ხუთშაბათს ერთ-ერთი ნავთობმზიდი წყალსავალის სამხრეთით მდებარე გასასვლელის გადაკვეთისას ნაღმს შეეჯახა. მეორე სუპერტანკერს კი სრუტის აღმოსავლეთ ნაწილში მარშრუტიდან გასვლისას ცეცხლი გაუჩნდა. მეორე გემთან მისულ ბუქსირსაც ცეცხლი წაეკიდა, როცა ის ხანძრის ჩაქრობას ცდილობდა.

ტრამპმა სამხრეთ კორეა გააკრიტიკა, რადგან მისი თქმით, ქვეყანა ირანში ომისთვის არასაკმარის მხარდაჭერას იჩენდა. ამ ზაფხულს მან ორი ქვეყნის შეიარაღებული ძალების მასშტაბური ერთობლივი სამხედრო წვრთნებიც შეამცირა. ამ ნაბიჯმა აშშ-ის მოკავშირე შეაშფოთა.

დანაყოფი 2009 წლიდან ადენის ყურეშია განლაგებული, სადაც კომერციული გემების უსაფრთხო ნავიგაციას უზრუნველყოფს.

სამინისტროს წარმომადგენლის თქმით, შუამდგომლობა დანაყოფის ახლო აღმოსავლეთში განლაგების ვადის გაგრძელებასაც ითვალისწინებს. ვადა 2026 წლის ბოლოს იწურება. წარმომადგენელმა სააგენტო „იონჰაპის“ (Yonhap) ცნობაც დაადასტურა.

ტელეკომპანია YTN-ის ცნობით, დანაყოფში ამჟამად შედის 4 400-ტონიანი გამანადგურებელი, საზღვაო ოპერაციების ვერტმფრენი, სამამდე გასაბერი ნავი ხისტი კორპუსით და დაახლოებით 300 სამხედრო მოსამსახურე.