რუსეთმა ანდრეი ზვიაგინცევი „უცხოეთის აგენტად“ გამოაცხადა

რუსეთმა თანამედროვე კინოს ერთ-ერთი უმნიშვნელოვანესი კრიტიკული ხმა „უცხოეთის აგენტად“ გამოაცხადა. საფრანგეთში, ემიგრაციაში მცხოვრები რეჟისორი ანდრეი ზვიაგინცევი იმ ცნობილ რუსებს შეუერთდა, რომლებსაც სამშობლოში მასშტაბური სამართლებრივი, ფინანსური და ბიუროკრატიული რეპრესიები ემუქრებათ.

საფრანგეთმა ზვიაგინცევის ახალი ფილმი „მინოტავრი“ რამდენიმე დღის წინ ოსკარის საუკეთესო საერთაშორისო ფილმის ნომინაციაზე წარადგინა. ზვიაგინცევმა წელს კანის კინოფესტივალზე ამ საზოგადოებრივად კრიტიკული თრილერისთვის ფესტივალის მნიშვნელობით მეორე ჯილდო, ჟიურის დიდი პრიზი მიიღო.

ფილმი რუს ბიზნესმენზე მოგვითხრობს, რომელიც თავის კომპანიაში დიდ გამოწვევებს აწყდება და ცოლის ღალატს ამხელს. ზვიაგინცევი ამ ამბავს უკრაინის წინააღმდეგ რუსეთის აგრესიული ომის ყველგანმყოფობას უკავშირებს.

რეჟისორმა კანში რუსეთის პრეზიდენტ ვლადიმერ პუტინს მოუწოდა, უკრაინაში „უაზრო ომი“ და სისხლისღვრა დაუყოვნებლივ დაასრულოს.

კრემლმა ეს მოწოდება მკაცრად უარყო და განაცხადა, რომ ზვიაგინცევს ამგვარად საუბრის ან სამხედრო მოქმედებების დასრულების მოთხოვნის „უფლება არ აქვს“.

რუსეთის იუსტიციის სამინისტრო მწვავედ გაკრიტიკებული „უცხოეთის აგენტის“ იარლიყით როგორც ცალკეულ პირებს, ისე ორგანიზაციებს დაღს ასვამს. ამის შემდეგ ბევრი გადარჩენისთვის იბრძვის, რადგან, მაგალითად, მხარდამჭერებს, ბიზნესპარტნიორებსა და შემოსავლებს კარგავს. უკრაინის წინააღმდეგ აგრესიული ომის დაწყების შემდეგ რუსეთში ოპოზიციონერებისა და კრიტიკულად განწყობილი ადამიანების დევნა კიდევ უფრო გაძლიერდა.