სტარმერის დროს დახმარების შემცირება ყველაზე ღარიბ ქვეყნებს მეტად შეეხო

ახალი მონაცემებით, კირ სტარმერის მთავრობის დროს ბრიტანეთის დახმარების შემცირებამ ყველაზე მეტად მსოფლიოს უღარიბესი ქვეყნები დააზარალა. ამავე დროს, უფრო მაღალი შემოსავლის მქონე ქვეყნებისთვის გამოყოფილი დახმარების წილი გაიზარდა.

საგარეო, თანამეგობრობისა და განვითარების ოფისის (Foreign, Commonwealth and Development Office) ბოლო მონაცემებით, ყველაზე ნაკლებად განვითარებული და დაბალშემოსავლიანი ქვეყნების დაფინანსება 6,7%-ით შემცირდა. შემცირების ოდენობამ 118 მილიონი ფუნტი შეადგინა.

2025 წელს გაერთიანებული სამეფოს განვითარების ოფიციალური დახმარების მთლიანი ბიუჯეტი მთლიანი ეროვნული შემოსავლის 0,44%-მდე შემცირდა. 2024 წელს ეს მაჩვენებელი 0,5% იყო. ბიუჯეტი 987 მილიონი ფუნტით შემცირდა. დამატებითი შემცირება კირ სტარმერის მიერ გასულ წელს გამოცხადებული გეგმის ნაწილია. სტარმერმა თქვა, რომ თანხა თავდაცვის ხარჯებზე გადანაწილდებოდა.

საქველმოქმედო ორგანიზაციების ქსელ „ბონდის“ (Bond) პოლიტიკისა და ადვოკატირების დირექტორმა გიდეონ რაბინოვიცმა განაცხადა, რომ „შემაძრწუნებელია“, ყველაზე ნაკლებად განვითარებულ ქვეყნებს შემცირების მთავარი ტვირთი რომ დააწვათ.

რაბინოვიცმა თქვა: „ამ შემცირებების ადამიანური ფასი უკვე იგრძნობა. კრიტიკულად მნიშვნელოვანი ჰუმანიტარული პროგრამები უკვე იძულებით იხურება, სიერა-ლეონეში დედათა ჯანმრთელობის მომსახურებიდან აფრიკაში შშმ ბავშვების განათლებამდე“.

მან დასძინა: „მსოფლიოს მარგინალიზებულ თემებს, მათ შორის, კლიმატის ცვლილებისადმი მოწყვლად და კონფლიქტით დაზარალებულ რეგიონებში, სტარმერის მთავრობის პოლიტიკური არჩევანისთვის ყველაზე მაღალი ფასის გადახდა უწევთ“.

დახმარების ყველაზე დიდი წილი, 18,4%, გაერთიანებულ სამეფოში თავშესაფრის მაძიებელთა ადგილობრივ ხარჯებზე დაიხარჯა. 2024 წელს ეს მაჩვენებელი 20% იყო.

დახმარების სამი მთავარი მიმღები უკრაინა, იემენი და ავღანეთი იყო. უკრაინისთვის განკუთვნილი დახმარება დაცულია, თუმცა მომავალი შემცირებების შედეგად 2028/29 წლისთვის იემენი 28%-ით, ხოლო ავღანეთი 39%-ით ნაკლებ დახმარებას მიიღებს.

დაბალშემოსავლიანი ქვეყნებისთვის დახმარება შემცირდა. ამავე დროს, საშუალოზე დაბალი შემოსავლის მქონე ქვეყნებისთვის ის 13%-ით, ხოლო საშუალოზე მაღალი შემოსავლის მქონე ქვეყნებისთვის 2%-ით გაიზარდა.

დახმარების სფეროს ექსპერტებმა გააფრთხილეს, რომ გაერთიანებული სამეფოს, აშშ-ისა და ევროპის მიერ დახმარების შემცირება ჰუმანიტარულ მუშაკებს აიძულებს, დაუყოვნებლივ სიცოცხლის გადასარჩენი მხარდაჭერის გარდა ყველაფერი შეწყვიტონ. ექსპერტების თქმით, ამას მილიონობით თავიდან აცილებადი სიკვდილი შეიძლება მოჰყვეს.